Press "Enter" to skip to content

22 tylli jia ki jingtwa khyndew, khyllem dieng bad shlei um ha East Khasi Hills

Ka Sorkar ka la pynkhreh ïa ki lad jingïarap: Kyrmen Shylla
Shillong, Naitung, 10: U lapbah uba jur haduh lai miet lai sngi bad uba dang ïai bteng haduh mynta ka sngi balang u la wanrah ïa ka jingshah ktah ïa ki shnong kiba don ha kylleng ka rilum Khasi Jaintia bad ha rilum Garo kiba la mad ïa ka jingshlei um. Kat haduh mynta kane ka jingwan lynshop jong ki bor ka mariang kam shym la don kano kano ka jingjia kaba sngewsih ha kino kino ki bynta jong ka jylla
Katkum ka jingai jingtip jong u Eexecutive Director ka State Disaster Management Authority (SDMA), Meghalaya u la ïathuh ba ha kine ki ar phew saw kynta, ki don haduh phra tylli ki shnong kiba la shah ktah bad kynthup ïa hynriew ngut ki briew. Hapoh kine ki arphew saw kynta, ki don haduh lai tylli ki iing shong briew kiba la shah pynjulor na ka jingtwa kyndew, ha kaba kawei ka ing ka la julor bha bad ar tylli pat ki dei kiba ju mad ïa ka jingjulor kaba malu mala.
Tang ha East Khasi Hills pat ki la don haduh 22 tylli ki jingjia, kynthup naduh ki jingjia khyllem dieng, twa kynroh, shlei um na ka daw ka jingther jur u slap ha kine ki ar sngi ba la dep ha kylleng ki bynta jong ka distrik kynthup naduh Sohryngkham, Mawlyngad, Jyntah, Lumparing, Nongmensong, Pynthorumkhrah bad kiwei kiwei.
Ha ka jingïalang jong ka District Disaster Management Authority ba la pynïaid da ka Deputy Commissioner ka distrik, Kong Matsiewdor War Nongbri, la rai ruh ban phiah ïa ka nongbah Shillong ha ki hynñiew tylli ki zone ha kaba ïa kitei ki zone yn peit da ki Magistrate ne BDO ha kaba ki paidbah ki lah ban pyntip ha kitei ki zone lada don kino kino ki jingjia.
Katkum ka jingtip ba la ïohlum, ha ka dong Lumpyngngad, Nongthymmai Shillong kawei ka kali Alto bad kumba saw tylli eiei ki Scooty ar shaka ki la julor hadien ba ki la shah tap ha ki mawbah na ka jingtwa kynsan ka khyndew hynne ka step.
Kat haduh ba la thoh ïa kane ka khubor, kawei ka longiing ha Umpling, Shillong ka la lait thaw na ka jingshah rat ha ka kynroh kaba twa mynta ka sngi balang ha por kumba 3 baje mynstep.
Kane ka kynroh kaba la twa na ka jingwan tuid ka um na surok ka ïoh ban jynrat tang ïa ka iing shetja katba ki briew kiba sah hapoh jong kane ka iing ki la lait im namarba ki thiah sha kiwei pat ki kamra.
Ka jingther jong u lapbah uba jur, ka la pynshlei um ïa ka Wah Umkhrah, ka Wah Umshyrpi kiba don ha dohnud ka Sor Shillong, ka Wah Umngi kaba don sha ka thaiñ Kynshi, bad ka Wah Umsohiong kaba don ha East Khasi Hills, ka Wah Nondeiñ ha sor Nongstoiñ bad kiwei kiwei ki wahrit bad ki wahduh kiba la shah tap lin da ka um.
Na ka liang u MDC ka Mawlai Constituency, u Bah Teiborlang Pathaw, mynta ka step u la hiar jurip ïa ki pynthorkba jong ka shnong Mawlai Umshing kiba la shah tap ha ka um bad ïa ki katto katne ki lynti ïaid kjat kiba la shah pynjot na ka jingshlei jong ka um.
U Myntri ka tnat Revenue and Disaster Management ka Sorkar Jylla, u Ma Kyrmen Shylla ha ka jingïakren bad ki lad pathai khubor u la ong, “ngi ladep bthah lypa ïa baroh ki shnat treikam bapher bapher ka Sorkar Jylla bad kynthup ruh ïa ki Deputy Commissioner jong ki Distirct bapher bapher ka Jylla ba kin long kiba peitngor lada don kino kino ki jingjia ba twa khyndew ne ka jingshlei um ne kino kino ki jinglynshop kiba wan ki bor ka mariang.”
“Nga kyntu ruh ïa ki paidbah ba kim dei ban syier mynsiem kulmar hynrei ki dei ban long kiba peitngor ha kum kane ka por khnang ba kin dup lah ban ïada ïalade bad ki dei ruh ban pyntip mardor sha ki bor synshar District ne sha ki bor pynïaid shnong bad sha ki thanat kiba jan tam,” ong u Ma Kyrmen.
“Ngi sngewkmen ba wat hapdeng ka jingther jong u lapbah uba jur, kam shym la don kano kano ka jingjia kaba sngewsih hynrei watla ki don hangne hangtai tang ki jingjia ba shu long malu mala. Watla katta ngim shym la shim sting, hynrei ka Sorkar ka la pynkhreh lypa ïa ki lad jingïada ban ïarap ïa ki paidbah,” u la bynrap.
U la ïathuh ruh ba u Myntri Rangbah ka Jylla u Conrad K. Sangma da lade hi u la shimkhia ban bthah ïa baroh ki Ophisar ba kin shimkhia halor kane. “Nga kyrpad ruh ïa ki paidbah lada ki ngat ha kino kino ki jingjia ki lah ruh ban pyntip sha nga ban phah ïa ki lad jingïarap,”ong une u Myntri ka tnat Revenue and Disaster Management.