Press "Enter" to skip to content

Bom ki paid bhur ïa u Rangbah ha Shnong Klew, khlad noh hadien ba poi Hospital

Naba shah kynnoh ba dei u ‘Menshohnoh’

Nongpoh, Naitung 10: Uwei u Rangbah briew ha ka rta kaba 32 snem u la duh syndon ïa la ka jingim, kaba dei hadien ba ki paidbah na ka shnong Klew ha ka dong Klewlum la kynnoh ba ki la bom la shoh pynmynsaw ïa u haduh ba u la mynsaw jur tang na ka daw ka jingkynnoh ba u dei u Menshohnoh.
Une u Rangbah ba la shah bom pynmynsaw ha ki paid bhur la tip kyrteng kum u Mangkara Khymdeit uba poi shongkha ha ka shnong Mawkyrdem ba hap ha Umiam Police station bad u dei ruh u rangbah uba tei kum u Muster Roll ha PWD Bhoirymbong Sub Division.
Katkum ka khubor ba la ioh lum na ki Pulit ka Ri Bhoi, la ong ba une u rangbah la kynnoh ba u la
shah rah bor naduh ka miet jong ka 9 tarik u Naitung ha ki kynhun kiba ym pat ithuh dur khmat bad dei lyngba ka jingujor jong uwei u rangbah uba ia trei lang kajuh ka kam ba u la ioh jingtip ba une u rangbah u la shah bom shah shoh ha Klew ba ki Pulit ruh ki la hiar mardor ban twet ha kaba ïa ka met jong u la lap nawei ka khlaw hajan ka dong Klewlum ba hap hapoh ka shnong Klew ha Ri Bhoi.
Ki Pulit ki la iathuh ruh ba katkum ka jingtohkit halor kane ka jingjia la ioh jingtip ba ka daw kaba la pynlong ïa u ban shah shoh ha ki paid bhur ka dei halor ka jingkynnoh ba u dei u Menshohnoh .
Ha ka jinghiar ki Pulit mynta ka sngi la ïathuh ruh ba hadien ba la lap ia ka met na kawei ka khlaw la lap ba u dang im, hynrei u la mynsaw jur bad um tip briew shuh bad na ka liang ki Pulit ki la pynkit noh mar mar sha PHC Kyrdem ban ioh ka jingsumar, hynrei hadien ba la shah sumar kumba 4 kynta ei ei utei u rangbah u la khlad noh na ka daw ka jingmynsaw jur sha ki bynta ba shapoh kaba dei na ka jingshah bom shah shoh ha ki paid bhur.
Shuh shuh, ki pulit ki la iathuh ruh katkum ka jingtohkit halor kane ka jingjia haduh mynta sngi ki la ioh ruh ban kem haduh 16 ngut kiba don kti ha kane ka kam kynthup ia u rangbah dong ba la tip kyrteng kum u Tynshain Makri.
Na ka liang ki Pulit ki la dep ruh ban register ïa ka case pyrshah ïa kito kiba shah kem bad ka jingtohkit halor kane ka jingjia ka dang iaid shakhmat ban dang ioh kem ruh kiwei kiba don kti ha kaba bom bad shoh pynmynsaw ïa utei u rangbah haduh ba u la duh noh syndon ïa la ka jingim.
Kumba la ioh lum jingtip ruh da u Nongthoh khubor, mynta ka sngi naduh u SP ka Ri Bhoi bad kynthup ruh u Additional Deputy Commissioner ka Ri Bhoi na ka liang ka bor District ha ka jingialam u Bah D.P Kharsati kum u ADC ki la hiar ban tohkit halor katei ka jingjia bad ruh ban leh katkum ki kyndon jong ka aiñ.