Press "Enter" to skip to content

Hadien saw snem, kular ka sorkar ban pynphai biang ïa ka Land Bill sha KHADC

Kular ban pynjynsur noh ïa ka MMMC Rules
Shillong, Naitung 10 : Ka sorkar jylla ha ka sngi Balang ka la kular ha khmat u Chief Executive Member (CEM) bad ki Executive Member jong Khasi Hills Autonomous District Council ba kan sa pynphai biang ïa ka Land Bill sha ka Council khnang ba ki lah ban bishar bniah biang ïa ka ha shwa ba kin phah biang pat sha u Lat ban ïoh ïa ka jingmynjur.
Na ka liang u CEM, Bah Teiñwell Dkhar haba kren bad ki lad pathai khubor hadien ka jingïakynduh ïa u Symbud Myntri Rangbah ka Jylla, Bah Prestone Tynsong u la ïathuh ba na ka liang ka sorkar hi ka la kular ba shen kan sa pynphai noh ïa katei ka Bill.
“Ka jingbuddien jongngi ïa katei ka Bill kadei namar kadei ka Bill kaba donkam hynrei ka sahkut sah ha ka sorkar la bun snem khlem pat ïoh ïa ka jingmynjur na u Lat,” u la ong da kaba
bynrap ba ka Iing Dorbar jong ka KHADC ka la wanrah bad pdiang ïa katei ka Land Bill naduh u snem 2014.
La ïathuh ruh ba wat na ka liang u Commissioner and Secretary ka tnad District Council Affairs u la kular ban pyntip noh kham kloi sha ka Council halor katei ka bynta. U CEM u ong ruh ba mar ïa ïoh ïa katei ka Bill kin hap ban bishar bniah biang khnang ba kin ïoh ban rah biang ha ka Iing Dorbar bad ban phah sha u Lat ban ïoh noh ïa ka muhor jong u ba kan long aiñ noh.
Haba bynrap lang, u Executive Member ka tnad Land, Bah Titos Chyne u la ong ba baroh shi katta ki MDC ki ju kam ba kin ïada ïa ka khyndew ka shyiap hynrei lada katei ka Land Bill kam long aiñ kan ym pynkhlaiñ satia ïa ka nongrim jong ki. U la ong ruh ba haduh mynta hi, ka Council ka lah tang ban buh rekod ïa ka jaka puta hynrei ym ban rejistar.
Utei u EM u ïathuh ruh ba ka jingbym pat long aiñ katei ka Land Bill ka ktah ïa ka Council khamtam ha khappud namar kiba bun ki jaka ki hap ha ka jingpeit jong ki Hima bad kumta lada ki rejistar ki hap ban leit sha ka sorkar jylla namar ym pat lah ban leh ha District Council. “Tang namar ba ngim pat lah ban leh ha KHADC, ki Hima ki hap ban siew da ka dor kaba rem lada ki leit ban rejistar ha ka sorkar jylla,” u la ong.
Na ka liang ka Council ki la ïathuh ruh ba ha katei ka jingkynduh ki la kren kyllum ïa kaba bun ki Bill jong ka KHADC kiba dang sahkut ha ka sorkar kiba la poi ym duna ïa ki 39 tylli. La pynpaw ruh ba kane ka EC ba mynta ka buh thong ban buddien shwa ïa ki Bill kiba la dep ban shna da ki bor synshar ba la dep khnang ba kin ïoh long aiñ noh.
Ha kajuh ka por la ïathuh ba na ka liang ka Council ka la ïa kren ruh haba ïadei bad kiba bun ki jingeh kiba ki paidbah kiba don ïa ka par maw par shyiap ki kynduh. Ki la ong ruh ba na ka liang u Symbud Myntri Rangbah u la kular ban pynjynsur katba lah ïa ka kyndon jong ka Meghalaya Minor Minerals Concession Rules na ka bynta ka bit ka biang jong ki paidbah.
Ki Executive Member kiba donlang ha katei ka jingkynduh ïa u Symbud Myntri Rangbah ki kynthup naduh u Bah Teibor Pathaw, Bah Victor Ranee, Bah Rangkynsai Kharbuki, Bah Martle N Mukhim bad i Kong Magdalyne S Mawlong.