Press "Enter" to skip to content

Ka Behdeiñkhlam ka dei ka Cultural bad ka Religious Tourism

La shai yn sdang ka Behdeiñkhlam Jowai

Jowai, Jylliew 10: Ka Behdieñkhlam, kaba dei kawei na ki tamasa kaba heh jong ki Pnar ha Rilum Jaiñtia kaba ïaid ryngkat bad ka niam ka rukom kala khring ïaki ba bun ki nongwan kai suwari na bar ri bad napoh ka ri na kylleng ki jylla.
Kane ka tamasa wat la kala paw kum kawei na ki tamasa kaba tip kum Cultural & Religious Tourism, hynrei ka dang duna ki lad jingarap ba la synñiang da ka sorkar jylla haba nujor bad kiwei kiwei ki tamasa ban kyntiew bad pynphuh pynphieng ïaka Behdeiñkhlam. Ki don ruh bun ngut ki nongwad bniah (scholars) kiba la wadbniah halor ka tamasa Behdeiñkhlam bad kila pyndonkam ïaki jngwad bniah jong ki haka jaka pule ne ha kaban thoh ïaki kynja khanatang, la ong kawei ka longkmie (bym kwah pynpaw kyrteng) kaba la thoh shaphang ka Behdeiñkhlam kumjuh ka Bamphalar ban pyndonkam haki skul bah.
Kala bynrap ba ka sorkar Jylla ban kyntiew ïaka Behdeiñkhlam- kaba la pyndep da bun bun tylli ki shong bad raij kum kawei na ki lad ban khring ïaki nongwan kai suwari ka dei ban wad ki lad ki lynti ban pynïaid iew lyngba ki kot bad dur ki dar ban khring ïa ki nongwan jngohkai.
Ka Behdeiñkhlam katba nang mih ki sngi ki snem kala nang nang heh bad ka Seiñriaj Jowai kaba pynlong ïa kane ka tamasa manla ka snem kala pyrshang har rukom ki jingpyrshang ban pynphuh pynphieng ïa kane ka tamasa bad kala sam ruh ki kot lyngkdop ha kylleng ki jaka, ki hotel ban ïathuh sha ka pyrthei ïaka jingriewspah ka niam bad ka kolshor.
U President bad General Secretary jong ka Seiñraij Jowai ba kynthup ïa u Ma OR Shallam bad u Arwotki Sumer kila ïathuh ba ki nongwan jngohkai pyrthei manla u snem ki wan sakhi ïa ka Behdeiñkhlam. “Naduh u snem 2012 ter ter ki nongwan kai suwari na England, Germany, Ireland, USA bad kiwei kiwei ki ri nalor ki Jylla bapher bapher kiba don hapoh ka Ri India kila wan sakhi ïaka Behdeiñkhlam,” la ong u Ma OR Shallam.
U Ma Shallam ula ïathuh ba mynta u snem kila ïoh ka jingkyrshan pisa na ka NEC lyngba ka tnad Tourism ka Jylla T.25 Lak bad mar T.1 lak na ka Jaiñtia Hills Autonomous District Council (JHADC) bad ka Art and Culture ka Sorkar Jylla. “Ïa kane ka pisa kaba ngi jingkyrshan na kine ki tnad ka lut haka jingpynkhreh ïaka pandal bad ka bam ka dih bad khyndiat kynsoit la sam sha ki dong/shnong.”
Naduh u bnai Lber ka knia ka khriam ban pynkhreh ïaka Behdeiñkhlam kala sdang bad baroh ki jingpynlut pynsep la biang da ka Seiñraij bad u Dolloi u khlieh jong ka niam bad kiwei kiba don bynta haka niam kin hap ban pynlut hi ïaka jingdonkam, la ong u ma Shallam.
U Ma Shallam ula ïathuh ba ka Behdeiñkhlam ka Raij Jowai mynta ka kynti kan sdang naduh lashai ka sngi Naitung 11 haduh Naitung 14. U Myntri Rangbah ka Jylla u Conrad K Sangma un wan ban ai ka kyrkhu kyrdoh ïaka Behdeiñkhlam. Yn don ruh ki Myntri sorkar ka Jylla, u nongïalam ka liang pyrshah ka Sorkar, MLA MDC bad u Chief Justice ka Meghalaya High Court.
Ka Seiñraij Jowai ka ai khublei ïaka bor pynïaid district jong ka West Jaiñtia Hills kumjuh ïaki tnad sorkar ka PHE, PWD bad ka tnad Pulit kiba la shimkhia ban pynbiang ïaki jingdonkam ban ïaid beit ka Behdeiñkhlam.
Lashai ka nohphai sngi ki paid riewngeit ka Niamtre kin pynpoi ïa u Symbood Khnong ha Jowai. Ka Chilliangraij, kaba dei ki khun ki ksiew ka Bon ne Khon Raij- kin wan pynpoi ïa ka Symbood Khnong ha jaka niam ha u Tre-Lum Sooiung ha kaba yn buh shimiet.
Ka Seiñraij Jowai kala khot la wer a baroh ki nongshong shnong ka sor Jowai ban ai ïatreilang namar ba ki deing khlam kin wan poi na kylleng ki jaka bad kan ktah ïaka ïaid ka ieng u paidbah. La kyntu ïaki nongniah kali ban buh kali haka ki jaka ba dei ban buh ban nym pynthud ïaki ba ïaid bad ban bud ryntih ïaka aiñ niah kali ban lait kino kino ki jingeh bad ka jingleh kmen Behdeiñkhlam kanlong kaba jop.