Press "Enter" to skip to content

Ka jingïada ïa ki khunlung ki khynnah ka dei ban sdang na la rympei : SSSS

Mawkyrwat, Naitung : U bah Moonliroy Lyngdoh, General Secretary ka Synjuk ki Seng Samla Shnong Shiliang Um Zone Sepngi ula ong ba, “ka jingïada ïa ki khyllung khynnah ka dei ban sdang na la rympei, ha ki shnong ki thaw bad ban don ruh ka jingïatrei ryngkat ryngkat bad ki bor jong ka aiñ”, ha ka jingkren jong u ha ka Rally-cum-Awareness Program ban pynrem halor ka jingshah thombor i heprit ba dang 10 snem karta ha kine ki bnai ba la dep ha uwei u briew uba kyrteng u Munsen Lyngkhoi.
Shuh shuh ha ka jingkren jong u ha kane ka sngi, ula pynrem jur ha kaba ïa dei bad kane ka kam pap kam sang ba la leh da une u briew bad kumjuh ruh na ka liang ki nongkren kiba la shimbynta ban kren ha kane ka sngi ki la ban jur ruh ba ïa kiba kum kine ki jait kam, kim dei ban ïa kren ïasuk noh (compromise) tang namar ba u dei uba ha ïing, para kur para kha, ne ïa sngew paralok bad da kaba ong ba lada lap ïa kiba kum kine ki briew kiba ïa kren ïasuk (compromise) ka aiñ ruh kan nym shah bad ki da pynrem ruh ïa kiba kum kita kiba donkti ban ïa kren ïasuk ïa kine ki kam pap kam sang. Ki la kyntu ruh ïa ki paitbah ba ki dei ban ïatreilang nyngkong bad ki rangbah shnong, ki longkmie jong ka shnong, samla jong ka shnong bad pyntip ruh ïa ki sengbhalang kiba ïa treimon sngewbha ïa kiba kum kine ki jait kam. Ha kajuh ka por ki nongkren ki la dawa ruh ïa ki bor jong ka aiñ ba ki dei ban pyntrei kam hok ïa ki kyndon ba la register case pyrshah ïa une u nongthombor khnang ba kin nym mlien shuh bad ba kan nym ai mynsiem ïa kiwei pat ki nongleh ïa kum kine ki kam sniew kiba ka imlang ka sahlang kam pdiang.
Ïa kane ka Rally-cum-Awareness Program la pynlong da ka Co-ordination Committee kaba kynthup ïa ki saw tylli ki seng kata ka HYC Mawthawpdah Area Unit, ka Synjuk ki Seng Samla Shnong Shiliang Um Zone Sepngi, ka Synjuk ki Seng Longkmie bad ka Synjuk ki Nongshynshar Shnong Mawsynrang Area ha ryngkat ka jingïashimbynta lang ka seng KSU, ki paitbah jong ka dong ka thaiñ Mawsynrang bad ki khynnah skul ha kaba la sdang naduh ka shnong Mawsynrang bad pynkut haduh ka skul Seven Sister’s Secondary School ha kaba ka jingthmu ka dei halor ka nongrim ban pynrem ïa u runnar bad kumjuh ruh ban pynshai paitbah ïa ki aiñ ki kanun bad kumno ki dei ban ïada ïa ki khun ki kti haba ïa dei ryngkat bad ka jingshah thombor.
Ha ka Awareness Programme la wan ban ai jingpynshai ruh napoh ka Police Department, na District Child Protection Unit bad na u Legal cum Provision Officer, South West Khasi Hills District ha kaba na ka liang jong ki ki la ai shibun ki jinghikai ha kaba ïa dei ryngkat bad ka Juvenile Justice Act bad ka POCSO Act. Shuh shuh ki la ai ruh ki jinghikai da kaba pyni ryngkat ïa ki video clip, ïa kiei ki bynta ba dei ban ktah bad kiei ki bynta ki bym long ban ktah ïa ki khyllung ki khynnah da kaba kyntu ïa ki paitbah bad ki shnong ki thaw haba jia kum kine ki jait kam ki dei ban pyntip mar mar ha ki bor jong ka aiñ khnang bad ka aiñ kan leh ïa kaba donkam.
Na la liang jong ka Co-ordination Committee ka ai khublei ïa ki paitbah, ki seng bapher bapher bad ïa ki khynnah skul bad khamtam ïa ki officer napoh ka Police Department bad na ka District Child Protection Unit, South West Khasi Hills District kiba la wan ban ïa shim bynta ha kane ka Rally cum Awareness Program watla hapdeng jong u slap uba jur hynrei ki la ïa mih ryntih ha ryngkat ki shatri kaba long kum ka dak ban ïa snoh kti lang ha kane ka kam.