Press "Enter" to skip to content

Ka jingshlei um ha Sor Shillong, kiei ki daw?

Ka jingther jong u lapbah uba jur ka la wanrah ïa ka shem lanot kaba jur bha ïa ki paidbah nongshong shnong jong ka Jylla. Ka jingwan lynshop jong ki bor ka mariang ka la pynlong ïa ki paidbah ban im hapdeng ka jingkordit bad ka suhsat namar ka jingtwa khyndew, ka jingshlei um, ka jingshah pynjot ki lynti ki synkien.
Ha ri Khasi kaba long long ka jaka lum kan thaw histori ha ka sien banyngkong eh ba kan mad ïa ka jingshlei um kylleng ki District. Ka jingshah ktah jong ka ri Khasi na ka jingshlei um kylleng sawdong ki shnong ka thaw ka la buh ïa ki paidbah ha ka jingeh bad ka suhsat. Khlem da ïakren ïa ki jaka kiba ju mad ïa ka jingshlei um tang shu poi ka aiom lyiur namar ka jingshlei ha kane kynti ka la wanrah ïa ka jingjulor kaba khraw bha ïa ki paidbah ha kaba ki la mad ïa ka jingtwa khyndew kiba khyllem ha ki iing briew.
Haba shu kyrtiang dien sha u snem uba ladep ba ka Jylla Meghalaya ka la ïoh ïa ka jingjur slap kaba shyrkhei bha ka la wanrah ruh ïa ka jingduh noh jong ki mynsiem briew kiba la kylla long ki lanot tang ka jingkhyllem ki dieng, ka jingtwa ka khyndew ha ki ing briew bad ka jingshlei um.
Ka jingkylli kaba mih mynta hangne ka long, balei la jan man ki shnong ki thaw ki shlei um haba ka jingjur slap ka dang neh tang kumba 3 lai sngi lai miet hynrei kaba lyngngoh pat ka long ha ki snem kiba kham mynshwa, watla ka jylla ka mad ïa u slap khyndai sngi khyndai miet kham niar ban jia kino kino ki jingshlei um, ki jingshah lynshop ha ki bor mariang bad kiwei kiwei ki daw kiba buh jingkylli ia manla kawei pa kawei ka longiing.
Ka Sor Shillong kumba ka long mynta ka dei ka sor kaba la heh bad kaba la ïar bad ka jingbun briew ka la nang kharoi manla ka sngi na uwei u bnai sha uwei u bnai bad na uwei u snem sha uwei u snem. Ka jingtei iing bad ka jingshna surok ka la nang jur manla ka sngi. La donkam ïa ka Sorkar lyngba ka tnat Pynroi Sor ba kan peitngor lada ki nongshong shnong ki leh be-aiñ bad ki pynkheiñ ïa ki kyndon shna iing.
Haba pyrshang ban tih ïa ka daw, ka jingshlei um na ka jingther jong u slapbah uba jur hi ka dei na ka jinglehsat ki paidbah ïa ka mei mariang. Ka jingkyntur ban thaw iing thaw sem sha rudwad ka dei kawei kaba pynbitar ïa ka Wah ynda la jur u slap, ka um kam don lynti ïaid bad ka jingset ki jaboh jabaiñ ka la pynlong ïa ka wah ban shlei wat sha ki surok shnong bad wat sha ki ing briew. Ka jingbret ñiut pathar jong ki riew khlem jabieng ka dei sa kawei pat ka daw kaba pynlong ïa ka jingshlei um ha ki shnong ki thaw. Ka daw kaba kongsan eh ka dei ka plastik kaba set lut ïa ki nala rit ki nala heh. Kane ka dei kawei ka daw kaba pynlong ïa ka um ban ym ïoh lynti ïaid ban tuid beit sak sak sha ka wah bad kaba wanrah pat ïa ka jingshlei um. Sa kawei pat ka daw ka dei ka jingshna iing khlem akor jong ki briew khamtam ka jingshna kynroh torti tang ban kham ïoh kamai ka bai sngi kaba wanrah ïa ka jingtwa ka kynroh iing kaba shong synjor ynda ka um ka la bam ïa ka kynroh bad khyllem sha ki ing briew ha ka por ka bym poi pyrkhat.
Kum kine kiei kiei ka Sorkar bad ki bor synshar shnong synshar thaw ki la dei ban pyrkhing bha bad ki la dei ban teh pyrkhing da ka aiñ namar ka jingleh dusmon bad ka jingleh torti ka wanrah pat ïa ka lanot ïa kiba bun balang.
Ki bor synshar District naduh mynta ki la dei ban teh pyrkhing da ki kyndon aiñ ban mana ïa ki paidbah nongshong shnong ba kim dei satia ban leh khlemakor da kaba bret pathar ïa ki nuit ki nier bad khamtam ki plastic ha ki lynti shnong, ki surok shnong, ki nala shnong. Ka jingkyntur pud ban klun ïa ka nala shnong ruh ka dei sa kawei pat ka daw kaba pynlong ïa ka um ban shlei katba shaba ïoh jaka.
Lada ki paidbah nongshong shnong kim sngewthuh ïa kine ki jingeh kan sa nang buh jingeh shuh shuh ha ki snem ki ban sa wan lada ki paidbah kim ai ka jingïatreilang bad ki bor sorkar. Kam myntoi ban pynkhuid shnong tang shwa ka aiom khristmas bad ha ka 2 tarik u ‘nai Risaw manla u snem katba manla ka sngi ka jinglehsat ïa ka mariang ka long kaba shyrkhei haduh katta katta.
Nalorkata, ki paidbah ki dei ban sngewthuh ba ka jingthung dieng ruh ka dei kawei ka bynta kaba kongsan tam ban ïada ïa ka jingshah rong ka khyndew ha ka por ba wan u lapbah lapsan. Kum kine kiei kiei ki paidbah ki dei ban shim halade ïa ka jingkitkhlieh ym ban shu ap tang ïa ki bor synshar shnong ne ki bor sorkar ban da wan pynshai haduh tyngkong iing kumno ban ïada bad ban sumar ïa ka mariang.