Press "Enter" to skip to content

Ka sorkar ka dang lung hynrei ki kam ki la kren jam bha: Conrad Sangma

Ka sorkar MDA kam ju leh shilliang ïano ïano ruh

Nongstoiñ, Naitung 10: “Ka sorkar ka dang lung hynrei phi la ïohi ba tang hapoh shi snem shiteng, shibun ki kam bad ki jingkylla ngi la leh na ka bynta ka jingbit jingbiang ki nongshong shnong ha ka Jylla”, ong u Myntri Rangbah ka Jylla u Conrad K.Sangma haba ai jingkren ha ka Nongstoiñ College hynne ka sngi.
U Myntri Rangbah ha ka jingkren plie jong u ïa ka Hostel bad ka Building jong ka College, u la ong ruh ba ka sorkar ka don ïa ka jingkitkhlieh kaba khraw ban wanrah ïa ka pule puthi kaba biang ha man la ki District jong ka Jylla. U la ong ba kumba ka sorkar MDA ka la leh ïa kiwei ki College ha kiwei ki District jong ka Jylla, ïa ka Nongstoiñ College ruh yn leh kumjuh.
Ha kaba ïa dei bad ki jingdonkam jong ka Nongstoiñ College, u Conrad Sangma u la pynpaw ba ka sorkar
ka don la ka jingkitkhlieh bad ka la pynkhreh ruh ban thung shuh shuh ki nonghikai bad ban mang pisa khambun ïa kane ka College na ka bynta ki jingdonkam, khnang ba yn lah ban shakri kum ka College ba pura.
Na ka liang jong u, u la khot ruh ïa ka jingïatreilang jong baroh ki nongshong shnong ryngkat bad ka sorkar, khnang ban lah ban pynurlong ïa ki kam pynroi bad ban kyntiew ïa ka Jylla ha ki bynta baroh. U la pynpaw ba watla ka sorkar ka dang shi snem shiteng, hynrei shibun ki kam pynroi la leh kylleng ki jaka, kum ka pule puthi, ka umbam umdih, ki surok kali bad ka dei ruh ka sorkar ka bym leh shilliang khmat ïano ïano.
U la ai jingïaroh kyrpang ruh ïa u local MLA Bah Macmillan Byrsat namar ka jingtrei shitom bad ka jinglah jong u ban treikam, kat haduh ba tang hapoh shisnem shiteng jong ka jinglong nongmihkhmat, la lah ban wanrah ïa ki jingkylla kiba bun ha Nongstoiñ naduh ka surok kali hapoh sor bad nongkyndong, ka umbam, ka kam pule puthi bad kiwei.
Ha ka jingïalang ha Nongstoiñ College, la donlang ruh da u MLA ba don burom Bah Macmillan Byrsat, u Syiem ka Hima Nongstoiñ Ma E.P Syiem, u Principal barim jong ka College Bah B.K Laitflang, I Principal Dr Mrs I.Mawthoh, u Deputy Commissioner Bah T.Lyngwa IAS, Superintendent of Police Bah Bashan J.Laloo, ki nonghikai, ki kmie ki kpa bad ki samla pule.
Kumban shu kdew hangne ba kitei ki building ba la plie hynne, la shna na ka Rashtriya Uchchatar Shiksha Abhiyan 1.0 bad NLCPR project (phase 2) ha ka jinglut kaba 4.5 klur tyngka. Na ka liang I Principal I la aiti ruh hakhmat u Myntri Rangbah ïa ka memorandum jong ka College kaba ïa dei bad ki jingdonkam kiba dang bun na ka bynta ban shakri khambha ïa ka pule puthi ha Nongstoiñ, West Khasi Hills.
Ha kajuh ka sngi, na ka liang u Myntri Rangbah u la ïakynduh kyrpang ïa u Executive Engineer jong ka tnad PHE bad PWD ha Circuit House Nongstoiñ. Na ka liang u Myntri Rangbah u la kren halor ki project kiba ïa dei bad ka tnad PWD kaba don mynta ha ka jingpynkhreh ban pynitynnad ïa ki surok ha sor Nongstoiñ. Katba na ka liang u Executive Engineer ka PHE u la pyntip ba ka tnad ka la pynïaid shait shait ïa ka Nongstoiñ Urban Water Supply Scheme bad la khmih lynti ba hapoh u Lber 2010 la lah ban pyndep lut.