Press "Enter" to skip to content

Mynjur ka Sorkar NDA ban bsut ïa ka kyndon ‘rai pynïap’ha ka POCSO Act

New, Delhi, Naitung 10: Ka Sorkar National Democratic Alliance (NDA) kala mynjur ïa ka kyndon ban pynkylla thymmai (Amendment) ïa ka aiñ Protection of Children from Sexual Offences, POCSO, Act, 2012 ba kynthup ïa ka jingpynshitom ba tyngeh bad ban rai pynïap ïa ki briew ba leh be-ijot ïa ki Khynnah ba hapoh 18 snem.
Ha kane ka Amendment, la buh ruh ïa ka kyndon ban daiñ kuna kaba heh bad ban set along ïa kiba ring video khlem akor ba ïadei bad ki khynnah.
Haba ïakren bad ki lad pathai khubor, u Myntri ka Ministry of Information & Broadcasting u Prakash Javadekar, ula ong ba ka jingpynkylla thymmai ïa ka Aiñ, la khmih lynti ba kan pyntieng ïa ki runar ba kin iuhroit ïa ka longryngieng jong ki Khynnah namar ki kyndon kiba tyngeh bala pynrung ha ka Aiñ.
Kat kum ka jingong jong u, ka jingthmu jong ka Amendment ka long eh ban iada ïa ka bha ka miat jong ki khynnah bad ban pynthikna ruh ïa ka jingshngaiñ jong ki.
Ka POCSO Act, 2012 ka dei kaba la thaw ban ai jingiada ïa ki Khynnah na ki jingshah iuhroit ka long ryngieng la ka dei ha ki kam leh beijot, kren khlemakor ne shah ring video khlemakor haba phaikhmat eh sha ka bha ka miat jong ki khynnah.