Press "Enter" to skip to content

Palat 20 snem leh aiu u MLA ka Pynthorumkhrah ïa ka jingshlei um?

Hiar jurip u Chairman ka KHADC ha Pynthor
Shillong, Naitung 10: Jan manla ki lyiur haba ther u lapbah ba neh wat tang shisngi lynter taid, ka Shnong Pynthorumkhrah, bad Langkyrding kiba hap hapoh ka Pynthorumkhrah Constituency, kin dei ki jaka ba nyngkong eh ban mad ïa ka jingshlei um ba shyr khei bad ka daw jong kane ka jingshlei um la baroh katta ki jingshlei um, la lap ba ka dei beit tang na ka jingbym biang jong ki nala.
Ka jingshlei um jong kine ki Shnong ka Pynthorumkhrah Constituency kam dei satia kaba jia na ka jingkiew jong ka Wah Umkhrah kumba ju jia ha ki mynnor ba dang ïoh ïaid laitluid ka Wah hynrei ka dei ka jingwan tuid jong ka um nalor ki jaka lum-kaba pynshlei hi smam ïa ki pynthor, ki nala, ki surok bad ka rung ruh wat sha ki thliew ïing kiba don ha ki jaka them jong ka thaiñ.
Ha ki khyndiat snem bala leit noh, ka Tnad State Disaster Responce Force (SDRF) kala hap ban leit iarap ïa bun tylli ki Longïing ba sah ha Pynthorumkhrah namar ka jingshlei jong ka Um bad ka jingnang ïai kiew jong ka umsaw kaba la tap lut ïa sawdong jong ki Ïing sah jong ki. Naduh kane ka snem, ki bor district kila ithuh ïa ka daw jong ka jingshlei um ha ka thaiñ ba dei tang namar ka jing bym biang jong ki nala ne ka jaka ïaid lynti jong ka Um ba kan poi da kaba suk sha ka Wahumkhrah.
U Mawphor ha ka jingiaid jurip hynne ka sngi ia ka jingshlei um ha ka thaiñ ula lap biang kumba lap ha ki snem bala leit noh ba ka jingshlei um ha Pynthorumkhrah-Langkyrding kam dei satia na ka jingkiew um na Wah Umkhrah hynrei dei ka jingbym biang jong ki nala kaba pynartatien shibun ia ka jingioh skhim jong kane ka Shnong la ka dei na ki bor Sorkar ne na ki Nongmihkhmat.
Shaei jah ki skhim Sorkar, shaei jah ki skhim MLA ne MDC kiba la mang kyrpad da ka sorkar ban theh ïa ki kam pynroi kynthup ka jingshna pynbha ïa ki lynti ïaid, ki nala kiba paka ha manla ki shnong ki thaw jong ki Constituency. Ka Pynthorumkhrah bad Langkyrding kin hap ban kylli ïa kane na u MLA Bah A.L.Hek uba la long Nongmihkhmat jong ka thaiñ la palat 20 snem.
Mynta ka kynti ruh, ka jingshlei um na ka jingther u slap ba saw sngi lynter, kala wanrah ïa ka jingshlei um ba shyrkhei ha kane ka thaiñ jong ka Nongbah Shillong – haduh ba ki jaka them, ki pynthor kila kylla long kum ka duriaw bad ki surok kila shlei um haduh wat ki kali kila sahkut bad ym lah ïaid shuh.
Na ka liang u MDC ka Mawkhar-Pynthorumkhrah Bah Pynshngaiñ N Syiem ryngkat ki Nongïalam Shnong ka thaiñ, hynne ka sngi balang kila hiar jurip ïa kane ka jingshlei um hapoh ka thaiñ bad kila sakhi dala ki jongki khmat ba ka jingbym biang jong ki nala bad ki lynti ïaid ka um, ka dei ka daw bah ba wanrah ïa ka jingshlei um.
“Ka jingwan jurip jong ngi kam kut tang ban shu wan peit ïa ka jingshlei um hynrei ka long eh na ka bynta ban lap ïa ki daw tynrai. Ha kane ka jingjurip ngi lap ba dei ka jingbym biang ki nala ba sa shlei um ka thaiñ bad namar kane, kum u MDC ngan sa pyrshang ban leh eiei bad ngam kwah shuh ban dang don ka jingshlei um ha ki snem ban dang wan” ong u Bah PN Syiem.
U MDC uba dei ruh u Chairman ka KHADC, ula kyntu ïa ki Ningïalam shnong ba kin ai ka jingiatreilang bad ka KHADC lem bad ki Tnad Sorkar bapher bapher ban lah tehlakam noh ïa kane ka jingshlei um ha ka thaiñ haba wan ka lyiur.
Une u MDC ula ai jingmut ïa ka jingdonkam ban thaw noh da ka Joint Committee jong ki Shnong ba shah ktah na ka jingshlei um, ki trai jaka, ka Hima Mylliem bad ka KHADC na ka bynta ban iapyrshang wad lad wad lynti kumno ban weng noh ïa kane ka jingeh kaba lynshop ha manla ka lyiur.
‘Da ka jingthaw ïa ka Committee, ngin lah ruh ban thoh sha ki Tnad ka Sorkar Jylla kum ka PWD, ka Sorkar Pdeng kum ka Water Resources ba kin ai ka jingiarap ha kaban lah ban pynkut noh ïa kane ka jingshlei um ba manla u snem” ong u Bah PN Syiem.