Press "Enter" to skip to content

Shah kawang petrol bom ki BSF ha khappud EJH ha ki nongkhaïi tuh

Shillong, Naitung 10 : Hadien ba u Deputy Commissioner jong ka East Jaintia Hills District u la ïoh jingtip ba ki nongkhaïi tuh sha Bangladesh na ki bynta khappud jong katei ka district kata kiba khaïi naduh ki Masi, ki mar ki mata ki ju kawang petrol bom, pataka, pyndonkam da ki sum ne ki kynja tiar ba nep ban ïaleh pyrshah ïa ki BSF tang ba kin ïoh ban pynïaid ïa ki mar jongki sha shilliang ka India, kaba la wanrah ka jingmynsaw ïa kiba bun ngut ki shipai ïada khappud Border Security Force (BSF) kumta u la pynjari noh da ka kyndon aiñ 144 Cr.PC ha shi lynter ki bynta khappud jongka District.
Lyngba kane ka jingpyntreikam ïa kane ka aiñ ka ban treikam naduh mynta ka sngi tad haduh ban da pynbna da kumwei pat, la kang ban ïalum paidbah palat ïa ka san ngut ha kino kino ki jaka ha khappud, la khang ruh ban rah ïa
kino kino ki tiar pynmynsaw bad lada lap ïa kiba pynkheiñ aiñ kin shah kem. Hynrei ha ka por miet lada don kino kino kiba ïaleh pyrshah ïa ki BSF lada jia ba ym lah ban telakam ïa ki, ki bor ka aiñ ki lah ban pyndonkam wat da kiwei kiwei ki lad ki lynti ruh.
ïa kane ka aiñ la pynjari ban tehlakam ruh ïa ka jinglong jingman ka suk ka saiñ ha khappud, ban ïada ïa ka jingkhaïi tuh sha Bangladesh, ban ïada ïa ki BSF ban lait na ki jingmynsaw bad kumta ter ter. Naduh nangne shakhmat la khang ban ïalam ïa ki masi da ka kjat ne kali sha ki bynta khappud naduh ka por 6 baje mynmiet haduh kapor 6 baje mynstep. La ïathuh ba kitei ki nongkhaïi tuh ki dei kiba khaïi ia ki masi, ki kwai ki tympew, ki ktung, biri, sikret bad kiwei kiwei ki mar kiba la khang ban khaïi sha Bangladesh.