Press "Enter" to skip to content

Bthah ka Sorkar Pdeng ïa ki Sorkar Jylla ban thung doktor bad nurse ha ki post ba thylli

Shillong, Naitung 13 : Ka tnad ka koit ka khiah jong ka sorkar pdeng ka la bthah ïa baroh ki sorkar jylla hapoh ka ri ba ki dei ban thung ne pyndap noh ïa ki post jong baroh ki doktor bad ki nurse bad kiwei kiwei ki noingtrei para- medical kiba thylli ha baroh ki hospital jong ki jylla bapher bapher khnang ban lait ka jingban khia palat pud ïa kiba la don lypa ha ka kam.
Ha ka jubab ba la wanrah hapoh ka ïing dorbar thawaiñ Lok Sabha, u myntri khynnah ka sorkar pdeng ba dei peit ïa ka koit ka khiah u Ashwini Kumar Choubey u la ïathuh ba la bthah ruh ïa ki jylla ba kin thaw ki lad ki lynti ban siew tam ne ai jingsiew kyrpang ïa kito ki doktor bad ki nurse bad kiwei para-medical kiba trei ha ki thaiñ nongkyndong.
U la ïathuh ruh ba ka sorkar ka la thung ïa ka committee ka ban bishar bniah halor ki jingeh ba ki doktor bad ki nurse ki ïa kynduh khamtam na ki jingshah ktah kti ha ka por ba ki don ha ka kam. Nalor kane la bthah ruh ïa ki sorkar jylla ba kin peit ba kan nym don kano kano
ka jingsyier ïa ki doktor haba ki leit ban shakri ïa ki paidbah la dei ha sor ne ha nongkyndong ruh. Nalor kane la bthah ruh ban buh lypa ïa ka kynhun ba kyrpang ban leit ïarap kyrkieh ïa ki doktor lada ki ïa kynduh ïa kino kino ki jingeh.