Press "Enter" to skip to content

Bthah u CM ïa ki Tnad Sorkar ban pyndonkam lang noh ïa ki Bording na ka sngi

Shillong, Naitung 13: U Myntri Rangbah ka Jylla ula ong ba baroh ki Ophis Sorkar, ki PHC bad CHC ki dei ban pyndonkam lang noh ïa ki bording ba pynmih na ki bor jong ka mariang (Non Conventional Source of Energy) kum ka sngi ba lyer, ban khate ïa ka jingpyndonkam bording na ki Hydro Project.
U Myntri Rangbah ka Jylla Conrad Kongkal Sangma ula kren ïa kane haba pynhap pyrda ïa ka prokram Entrepreneurship Training on Solar Rooftop ba san sngi lynter jong ka Meghalaya New & Renewable Energy Development Agency (MNREDA), Mawpat hynnin ka sngi thohdieng.
Haba kren ha kane ka prokram ba iadonlang ki Ophisar ka Jylla, u Myntri Rangbah ka Jylla ula ongba ka Jylla Meghalaya kala lah ban pynmih haduh 300 MW ka bording bad pyndonkam haduh 1200 million unit ka bording bad ym duna ïa ka 2 MW ka bor ding la lah ban pynmih na kiwei pat ki thymmei nalor ka Hydro Project ba don ha ka Jylla.
Kat kum ka jingong jong u, ka Jylla ka don ha ka jingïaid lynti kaba dang jngai bah haba ïadei bad ka jingpynmih bording na kiwei pat ki thymmei. U ong ‘Ka Jylla ka don ïa ka bor ka buit ban pynmih bording na ka bor jong ka sngi bad dei kane ba kum kine ki prokram ki long kiba donkam bha ïa ka Jylla”.
U Conrad u ong ba ka jingpynmih bording na ka sngi, ka lyer bad kiwei kiwei, ka dei kaba kongsan bha na ka bynta ka ïoh ka kot bad wat ka mang tyngka jong ka Ri kala phai khmat bha sha kane ka bynta ha une u snem ba mynta..
U Myntri Rangbah ka Jylla u ong ba ka Sorkar Jylla ka don jingthmu ban nang kyntiew ïa kane ka kam kat kaba lah bad bynrap “Ki Hydro Power Plants kim pat biang ban lah pyndap ïa ka jingdonkam bording jong ka Jylla bad ka jingpynmih bording na kiwei pat ki thymmei ka dang long tang hapoh shi percent”. U pyntip ba ka jingpyndonkam ïa ki LED Lights ha Secretariat kala seisoh bha bad mynta ka Sorkar ka thmu ban pyndonkam noh ïa ki LED ha baroh ki Ophis treikam jong ka.
U Conrad u ong ba baroh ki Ophis Sorkar, ki PHC bad CHC ki dei ban lah noh ha kaban pynmih ïa katto katne ka bording bala pynmih na ki bor ka mrang bad kane kan iarap ban khate haduh 10% ïa ka jingbam bording jong ka Jylla ha ka shisnem ban wan.
Kiwei pat kiba la ai jingkren ha kane ka sngi ki kynthup ïa u Rakkam Sangma MLA ka Siju-Rongara bad u Rupert Momin MLA ka Kharkutta uba dei u Chairman ka MNREDA.