Press "Enter" to skip to content

ïatyngkhuh mawsiang ki Pulit ban tem ïa u Droks bym don De-Addiction Centre

Walta thmu pyntreikam da ka PITNDPS

Shillong, Naitung 13: Ka Tnad Meghalaya Police (MLP) kala pynpaw ïa ka jingeh ban tehlakam bad tem ïa ka jingjyllei jong u droks bad ki nongdih droks ha Jylla tang namar ba ka Sorkar Jylla haduh mynta kam pat lah ban wanrah ïa ki along ba kyrpang ban set ïa ki nongkhaii ne nongdih droks bad kumjuh ruh ïa ki De-Addiction Centre hapoh ka Jylla.
“Ka Tnad Pulit ka iatakhuh mawsiang ban ïakhun pyrshah ïa u droks namar hangne ha Jylla ki nongkhaii droks ki dei ki nong dih bad ki nongdih ki dei ki Nongkhaii” ong uwei u Heh Pulit u bym kwah pynpaw kyrteng.
Kat kum ka jingong jong une u Heh Pulit, ka jingbym don ki along kyrpang ïa ki nongdih ne nongkhaii droks bad ki de-addiction centre jong ka Sorkar Jylla, ka dei ka jingeh ba hakhmat duh ba long diengpyngkiang ïa ka Tnad Pulit.
“Kat kane ka jingkurup droks, ka jingkem nongkhaii droks ba jan manla ka sngi, kala dei ban pyntieng pynsmiej hynrei ngi iohi pynban ba ki nongdih ne ki nongkhaii ki nang shlur bad nang kha roi pynban” ula ong haba bynrap “Ka jingeh ba hakhmat eh ïa ka Tnad Pulit ka long ba ka hap pyrkhat arsien ban set along ïa ki nongkhaii ne ki nongdih droks namar ba kam don ïa ki along ba kyrpang kiban peitthuh ruh ïa ka koit ka khiah jong ki”.
“Lada ngi set along ïa ki, lada jia ryngkhat ba ki kem pang na ka jingbym ioh droks bad poi ruh ka jingjia ba sngewsih, mano ban bahkhlieh. Nalor kata, sa ki kynhun Human Rights mano ban pynsngewthuh ïa ki” ula ong.
Kat kum ka khubor ba iajan bad ka Tnad Pulit, la ïathuh ba ki Pulit ka East Khasi Hills Hills kila dep ïathuh haduh 4 tylli ki jaka ka Nongbah Shillong kum ki ktem ba jur eh ha ka jingkhaii droks hapoh ka Nongbah. Kine ki 4 tylli ki jaka ki kynthup ïa ka thaiñ Madanrting, ka thaiñ Jhalupara, ka Thaiñ Sweeper Lane bad ka thaiñ Polo-Golflink.
Kat kum ka jingong une u Heh Pulit, la ïathuh ba ka Tnad MLP kala don jingthmu mynta ban pyntreikam noh da ka aiñ ‘The Prevention of Illicit Traffic in Narcatics Drugs and Psychitropic Substances Act-1988 ( PITNDPS) ïa ki Nongdih bad Nongkhaii droks ban tehlakam ïa u droks hapoh ka Jylla.
Une u Heh Pulit u ong ba baroh shikatta, la lap ba ki Nongkhaii droks ne ki Nongdih Droks ki ju shim kabu ïa ka aiñ Narcatics Drugs and Psychitropic Substances Act 1985 namar ba don ka kyndon kaba ailad ïa ki Nongdih droks bad Nongkhaii Droks ba kin buh ka jingkyrpad ba kin leit sumar ïalade ban kylla kaba mut..
Kat kum ka jingong jong u, ka ‘The Prevention of Illicit Traffic in Narcatics Drugs and Psychitropic Substances Act-1988’ kan pynngat ïa ki Nongdih bad ki Nongkhaii droks ha ki kyndon ba kin nym lait da kaba suk ban shong along lada ki shah kem. Hynrei u ong ba da ka jingbym don ki De-Addiction Centre jong ka Sorkar Jylla ne ki along ba kyrpang ban set ïa ki nongdih ne nongkhaii droks, kala buh ha ka jingeh ïa ka Tnad an pyntreikam da kane ka Aiñ.