Press "Enter" to skip to content

Ieh shrah ka PWD ïa ka surok, syrtok ki paidbah jong ki shnong ka Raid Myrdon

Nongpoh, Naitung, 13: Tang namar ka jingbym shimkhia ka sorkar lyngba ka tnad PWD, ban siangrong ne ban pyndep ïa ka surok kaba tang 1 KM ei ei ha Lumjyrmi, ka la pynjynjar shisha ïa ki paidbah jong 11 tylli ki shnong, kiba don hapoh ka Raid Myrdon ha Ri Bhoi District.
Lah ruh ban kdew hangne, ba katei ka surok kaba la pyndonkam da kitei ki 11 tylli ki shnong, ka dei ka surok kaba la ïaid lyngba na Umran Ñiangbyrnai sha Quinine bad ha shi lynter katei ka surok ki la don bun tylli ki shnong, hynrei kaba pynsngewkhia eh ïa ki paidbah, ka long ba kim lah ban pyndonkam ha ka ïaid ka ïeng ki kali, namar katei ka 1KM ba pynsahteng ka da ka tnat PWD, kaba la pynlong syndon ba kan nym lah ban ïaid kali khamtam lei lei ha kaba kum kine ki por Lyiur.
Ka long ruh, kaba sngewphylla ban tip hangne ba ha shilynter jong katei ka surok naduh Umran Ñïangbyrnai bad kaba la mih pat sha surokbah ha shnong Quinine, kaba la don ïa ka jingjngai kumba 13 KM ei ei, ka dei ka surok kaba bha, hynrei kaba lyngoh ban tip ba mynta da ki phew snem, ka sorkar kam shem la pyndep ïa katei ka surok kaba don ïa ka jingjngai tang 1KM.
Haba ïakren bad u Nongthohkhubor, ki la don bun ki briew kiba sah ha katei ka thaiñ, kiba la pynpaw ïa ka jingsngewkhia halor ka jingpynsahteng ka PWD ïa katei ka surok bun la bun bun snem, ha kaba ki la pynpaw ruh ba tang namar ka jingbym pyndep ka PWD ïa katei ka surok kaba tang khyndiat, ka la pynlong ïa ki paidbah ba kin shem jingeh ha ka leit ka wan bad khamtam eh ha ki por ba kyrkieh.
“Ngi da sngewkhia eh halor kane ka jingsahteng surok, namar kum ki nongrep ki don ki khep kiba ngi kwah ban leit die ïa ki mar rep sha Nongpoh, hynrei tang namar ka jingbymlait ki kali ban ïaid na katei ka surok, ka pynlong ïangi ban gin hap ban ïaid lyngba ka Umsning ban poi sha Nongpoh bad kane ka la ktah shisha ïa ka jinglut jingsep, hynrei jin lada katei ka surok ka bha, kan da pynsuk eh ïangi ki paidbah” pynpaw uwei u nongrep.
Ym tang kata, hynrei jin lada ka sorkar ka shimkhia ban shan bha ïa katei ka surok kaba tang khyndiat, ka pynsuk ruh ïa ki paidbah jong bun tylli ki shnong kiba don ha kane ka thaiñ, namar ka la dei ka thaiñ kaba la don bun bun tylli ki shnong bad khamtam eh ha ka ïaid ka ïeng jong ki paidbah hapdeng kine ki shnong, bynrap utei u Rangbah.
Kumba ka long ba kane ka thaiñ jongngi, ka dei kaba don hapdeng ka Nongpoh bad Umsning, kumta na ka bynta ka jingsuk ki paidbah ha ka leit ka wan bad khamtam eh ïa kito kiba donkam man ka sngi sha Nongpoh, ka la dei ka por ïa u Nongmihkhmat ba un ïakren sha ka sorkar, na ka bynta ka pyndep noh ïa katei ka surok kaba la sahteng mynta ka bun bun phew snem.