Press "Enter" to skip to content

Kynduh jingeh ki paidbah nongshong shnong ka Hingaria ba twa khyndew

Khliehriat, Naitung, 13: Namar ka jingjur palat u slap, ki nongshong shnong ha ki jaka thaiñ khappud ki la ïa kynduh jingeh haduh katta katta ha kaba ïadei bad ka leit ka wan namar ka jingjyrsieh ka surok na ka jingtwa ka khyndew kaba la buh jingeh ïa ki kali ban ïaid lyngba ka surok.
Katkum u kyrwoh ba la phah da u Waheh Shnong ka Hingaria u Ma Dibor Pohchen bad u Secretary u Ma Garnes Talang, ki la ïathuh ba ka jingtwa ka khyndew ha ka surok ha kawei ka jaka ba ju khot ka Wahluri ka la buh jingeh ïa ki briew ha ka leit ka wan ha kaba ki paidbah ki la hap ban shu ïa bujli ïa ki nongleit jingleit na kawei ka kali sha kawei pat namar ka jingbym lait shuh ka surok.
Ki la ïathuh ba kane ka jingtwa ka khyndew ha Wahluri ka la buh jingeh khamtam ïa kito kiba pang ba shitom kiba thmu ban leit shim dawai sha Khliehriat.
“Na ka liang ka shnong bunsien ngi la ju maramot hi tang kat ban long ban ïaid, hynrei ka eh pat ïa ngi namarba ngim don ki puhshilum ne ki kor ki bor kiba biang ban pynkhuid kloi ïa ka surok. Kumta na ka liang ka shnong ka kyrpad ïa ki bor synshar District bad kumjuh ruh ïa ka tnat PWD ba kin peit lem ban maramot tang ban long ban ïaid ka kali ruh khnang ba kan ym wanrah jingeh than ïa kiba leit ba wan khamtam kiba pang ba shitom,” ong une u Waheh Shnong ka Hingaria.