Press "Enter" to skip to content

Mynta ka sngi yn pynkut ïa ka Behdeiñkhlam

Jowai, Naitung, 13: Ka Behdeiñkhlam jong ka Raij Jowai kala poi sha kaba kut noh lashai ka sngi U Blei ha pung kyntang Aitnar.
Ki kynrem ki lyndan ki ban wan lashaii ka sngi ki kynthup ïa u Myntri Rangbah ka Jylla u Conrad K Sangma bad ki Myntri sorkar bapher bapher nalor u Chief Justice Meghalaya High Court Justice Ajay Kumar Mittal bad kiwei kiwei.
Haba phai sha ka sngi balai jong ka Behdeiñkhlam ha ka sngi Saitjaiñ kala long kaba shongshit ha kaba da ki hajar ngut ki khun ka Niamtre ki la mih paidbah da ka dohnud kaba kmen ha ka jingsawa ka bom, ka tangmuri ryngkat ka ïa-risa ïa-kynhoi ban shad ha ki jaka niam bapher bapher ka seinraij hashuwa ban rah ïa ki diengkhlam sha ki dong bapher bapher bad ka Khnong Blai.
Ki kynthei longkmie bad ki samla kynthei ha la ka riam ka beit tynrai ki la ïamih madan ban peit kai ia ka jingshad ki rang samla bad ki rangbah.
Shuwa ban rah ïa ki diengkhlam bad Khnong Blai ladon ka nguh ka dem kaba la pyndep da u Dolloi bad u Kñia Nikhla ha Pohsawiar.
Ha kane ka por baroh ki bom, tangmuri ki la sangeh bad baroh ki khun ka raij kila shim bynta ha ka nguh ka dem. Hadien baroh ki Kmai Raij ki la rah la ki jong ki diengkhlam sha ki dong jong ki bad ki Khon Raij ki la rah ia ka Khnong Blai bad buh ïa ka ha Madan Moo Syiem ha ryngkat ka suit ka shor.