Press "Enter" to skip to content

Pynpoi ïa ki mar bam sha ki shnong ba shah ktah twa surok bthah ka DC ïa u BDO

Shillong, Naitung 13: Ka Deputy Commissioner jong ka East Khasi Hills District ka kong Matsiewdor War Nongbri kala bthah ïa u Block development Ophisar (BDO) jong ka Mawsynram Block ban lum jingtip ïa ki shnong kiba la shah ktah na ka jingther jong u lapbah kaba la wanrah ka jingtwa ïa ki surok bad ktah ïa ka leit ka wan jongki paidbah khnang ban pynpoi ïa ki mar bam mardih sha kitei ki jaka.
Ka Deputy Commissioner ka la ai ïa kane ka jingbthah hadien ba ka la ïoh ïa ka jingthoh na u MLA jong ka Mawsynram u bah Himalaya Shangpliang myn ha kane ka Sngi Thohdieng. Na ka liang ka DC ha katei ka juh hi ka sngi kala bthah ïa u BDO jong ka Mawsynram Block ban wad jingtip bniah shaphang ki shnong kiba la shah ktah na kane ka jingjur slap.
Haba ïa kren bad u nongthoh khubor.u bah Shangpliang u la ïathuh ba na ka liang jong ka DC ka la shim khia bha ïa ka kam bad ka la leh ruh ïa kaba donkam bad u kyrmen ba ha ka Sngi Nyngkong ka ophis jong u BDO ka Mawsynram Block kan phah ïa ki mar bam sha ki shong kiba la shah ktah ha kane ka jingshah lyngshop ha ka mariang.
Ki shnong kiba la shah ktah eh ha kane ka jingshah lyngshop jong ka mariang ki long ki shnong ha ka thaiñ Hatmawdon, ki shnong kiba don hapdeng ka Ryngkut bad ka Danggar bad hapdeng jong kine ki jaka ki don kumba 50 tylli ki shnong kiba la shah ktah na ka daw jong ka jingtwa ki surok ha kaba ki kali kim lah shuh ban pynpoi ïa ki mar bam.