Press "Enter" to skip to content

Pynshai ka NEIGRIHMS halor ka Eksamin

Shillong, Naitung, 13: Ka DM (Cardiology) jong ka NEIGRIHMS ka la pynshai halor ka jingkynnoh ba kiba pule ïa ka DM Cardiology ki la leit ban shong na ka bynta ka jingïaleh eksamin pynban ki la kyndit ban shem ba la pynsangeh noh ïa kane ka eksamin.
U incharge Dean Academics lyngba ka jingpyntip No. NEIGR/Exam/DM/2018/15-2451 Dated 9.7.19 u la pynbna sha baroh kiba don bynta ba ka DM (Cardiology) Practical Examination 2019 kaba la thmu ban pynlong ha ka 10 tarik bad 11 tarik mynta u bnai ba la pynkynriah noh tad ynda la pynmih biang da kiwei pat ki jingpyntip.
“Namarkata lada kine kiba pule ki la ïoh ïa ka jingpyntip ha ka 9.7.2019 ba ïa ka Practical Examination la pynkynriah noh, ba ki dang leit ban leit na ka bynta ka eksamin ha ka 10.07.2019 bad ki la shong hakhmat ka ophis jong u Director baroh shisngi ka la pynmih ïa ka jingkylli,” ong u kyrwoh ba la pynshai na ki bor pynïaid ka NEIGRIHMS.
“Ban pynshai shuh shuh ïa kane, baroh ki ‘professional examination’ kiba kynthup ïa ka MBBS, MD, MS, DM ki don arbynta. Kawei ka dei ka bynta jong ka ‘Theory’ kaba la pynlong da ka Examination Cell jong ka Institute bad ka bynta kaba ar ka dei ka ‘Practical’ ha kaba la khot ïa ki ar ngut ki ‘Internal Examiner’ na ki tnad ba dei peit bad arngut ki ‘External Examiner’ na ki riewshemphang na kiwei pat ki Institution/Medical Colleges,” ong u kyrwoh na u Director NEIGRIHMS.
Ha kane ka jingjia kaba mynta jong ka DM Examination, ïa ki Theory Paper la dep pynlong da ka Institute naduh ka 24 taik u Jylliew haduh ka 1 tarik u Naitung 2019. U Controller Examination NEIGRIHMS u la thoh ïa ka shithi sha u HOD Cardiology ban ai kyrteng ïa ki arngut ki ‘internal examiner’ hapoh ka 26 tarik u Jylliew na ka bynta ki Practical Examination ki ban sa pynlong. Ha kajuh ka por, u HOD Cardiology ha ka shithi kaba ha ka 25tarik u Jylliew 2019 sha u Director NEIGRIHMS ka la pyni dak ïa ka jingbym kwah ban ïashim bynta ha ki Practical Examination jong kiba pule DM.
U Director NEIGRIHMS ha ka jubab lyngba ka shithi jong u ha ka 26tarik u Jylliew u la kyrpad ïa u HOD Cardiology ban ïatreilang ban pynlong ïa ki DM Cardiology Practical Examination kiba ïaid beit bad ryntih na ka bynta ka jingbha jong ki ba pule. U Director u la ai jingmut ïa u HOD Cardiology ban ïatreilang bad u Dean bad u Controller Examinations ha kane ka bynta.
Katkum ka rukom pynïaid, la kynjoh ktien na ki arngut ki ‘External Examiner’, kiba ha kaba nyngkong ki la pdiang ïa ka jingkhot sngewbha ban pynïaid ïa ka Practical Examination jong ka DM Cardiology, hynrei ha ka por kaba khatduh ki la kyntait na ki daw shimet. U I/c Dean, namarkata, u la pynmih ïa ka jingpyntip ha ka 9.7.2019 ban pynkynriah noh shwa ïa ka examination.
Ka NEIGRIHMS ka ju pynïaid ïa ki eksamin bapher bapher kynthup ïa ka MBBS, MD, MS, bad MSc Nursing kiba ïaid beit bad ryntih, hynrei kane ka jingjia ka la jia tang ha kane kawei ka tnad ha kaba ka Examination Cell ka hap ban shaniah ha ki ‘Internal Examiner’ jong ki tnad bad ki ‘External Examiner’ jong kane kajuh ka ‘Specialty.’
“Baroh kiba pule ha kane ka Institute ki long kum ki khun shynrang bad ki khun kynthei jong nga, bad ngan long u briew uba kmen tam haba kiba pule ki pyndep ïa ki jingpule ha ki kyrdan ki ba shajrong bad wanrah nam bad burom ïa ka Institute,” ong u Director ka NEIGRIHMS.
La bthah ïa u Controller Examinations ban shim ïa baroh ki sien jam ba donkam ban pynlong ïa ka Practical Examination ïa kiba pule DM ha shwa ka 31tarik u Naitung.
“Nga kyrpad ïa ki Faculty jong ka Cardiology lyngba kane ka jingpyntip ban wan shakhmat ban pynthikna ban pynlong ïa ki DM Cardiology exam kiba ïaid beit bad ryntih,” ong shuh shuh u Director.