Press "Enter" to skip to content

Shah jied u samla na AP bad Meghalaya ha ka jingïakop shad Hiphop ha Mumbai

Shillong, Naitung 13: U Techi Gromb na ka Jylla Arunachal Pradesh uba la long u lahduh ha rynsan ïakop shad HipHop bad u Anil Chetri na Meghalaya bad u ba la wan ba ar ki la shah jied ban mihkhmat ïa ka thaiñ Shatei Lammihngi ban leit mihkhmat ha ka rynsan ïakop shad HipHop ha ka kylla ïakhun phainal ka ban sa long ha ka nongbah Mumbai ha u Nailur 2019.
Ha ka jingïakren bad ki lad pathai khubor mynta ka sngi saitjaiñ kine ki ar ngut kiba la shah jop ha kane ka rynsan ïakop, ki la pynpaw ba kim shym don ïoh satia ïa kano kano ka jingshah hikai kaba kyrpang hynrei kane ka jingshad HipHop ka dei kaba ki don hi nalade bad kaba ki ju sngewtynnad ïa kane ka rukom shad ha ka jingim jong ki.
U Techi Gromb, u la ong, “nga ju juh hikai shad hi ha la iing bad ha dien ba nga la ïoh jingtip ba kan don kane ka jingïakop shad nga la thep kyrteng bad ngam shym la poi pyrkhat ba ngan poi sha ka jingjop ha kane ka jingïakhun,” bad bynrap, “ïa mynta hi nga dang pynkhreh bha ïalade ban ïakhun pat sa ha ka phainal ka ban long ha Mumbai.”
U la ïathuh ba kum kane ka jingshad ha ka Jylla Arunachal Pradesh kam pat don bad ïathuh ruh u shu hikai hi ha la iing da kaba pyrthuh bud da kaba peit na Television.
Na ka liang jong u Anil Chetri na ka jylla Meghalaya u la ong ba kane ka jingshad ka la pawnam bha ha nongbah Shillong, bad ïathuh ruh ba tang shu ïoh jingtip u la pan jingbit na ki kmie ki kpa ban leit ïashim bynta ha kane ka rynsan ïakop da ka jingwan synran lang jong u hynmen.
Katba ha ka jingïakop shad Popping ïa kane ka jingshad la jop da u Jatin Karbar na ka nongbah Guargoan.
Une u samla uba dei ruh uba la kha bad la heh la san ha nongbah Shillong u la ong ba um lah satia ban klet ia ka nongbah Shillong kaba u la heh la san bad hadien ba la ïoh jingtip halor kane ka jingïakop u la wan ban ïashim bynta da ka jingkhmihlynti ban ïoh rah ïa ka nam jop.
Na ka liang u Director jong ka Ministry Dance u Satpir Singh u la ïathuh ba ka Shillong kam dei tang ka sor kaba ki briew ki ieid ïa ki sur jingrwai hynrei u don pat kawei pat ka jingangnnud ban pynlong ruh ïa kane ka nongbah Shillong kum ka nongbah kaba pawnam pat ha ka shad.