Press "Enter" to skip to content

Ka Water Policy ka donkam ban treikam kyrkieh

Mynta ba ka jylla la wanrah ïa ka Draft Water Policy ha ka jylla, kadei ka rai kaba biang palat na ka bynta ka jingdonkam ban tyngkai bad pynneh pynsah ïa ki um ki wah kiba don ha ka jylla. Ka Meghalaya kadei ka jylla kaba nyngkong eh ban wanrah ïa ka Water Policy ha ri India bad kan long ka history h ka ri hi baroh kawei ïa kane ka jingshim ka jylla ban wanrah ia kane ka jingtreikam kaban long ka jingkyrkhu na ka bynta ka lawei jong ki longdien ki ban wan.
Ban don noh da ka Policy ne ka rukom treikam, kadei ka jingangnud kaba la slem .Ka jingdawa ne ka jingpynpaw ban wanrah noh da ka Water Policy ha ka jylla, ka la paw nyngkong eh ha ka snem 2010, haba u Bah Ardent Miller Basaïawmoit, u la wanrah da ka Resolution hapoh ïingdorbar Assembly ha katei ka snem ban kyntu ïa ka sorkar ban thaw noh da ka Policy khnang ban wanrah noh da ka rukom treikam kaba thikna ha kaba ïadei bad ki um ki wah ha ka jylla. Ka sorkar ha katei ka por, namar ba u Bah Ardent udei na ka liang synshar, ka la phah weng noh ïa ka Resolution hadien ka jingpynshai bad ka jingïatai ryngkat bad ka jingkular ban shimkhia ïa kane ka kam kaba donkam bha.
Mynta hadien khyndai snem na katei ka jingkular, la ïohi ba ka jylla ka la khih ban ïoh ïa kane ka Policy kaba donkam bha, namar ba ki um ki wah ki long ka bynta kaba kongsan eh ka jingim u briew bad ka jylla ruh ka donkam ban the lakam ha kaba ïadei bad ki um ki wah. Ka don ka jingong ba ka thma bah kaba lai kan nym jia na ka jingïakynad, hynrei kan jia namar ka jingïaknieh um.
Kat shaba phai mynta la ïohi ba ka don ka jingkhih ka jingpisa mynsiem, namar ka jingnang rngad noh jong ki tyllong um, ka jingnang jaboh jong ki wah bad ka jingnang tyrkhong jong ki khlaw ki btap kiba long ki jaka kynshew ba kongsan jong ki um.
Ka Water Policy kan ïarap ruh ban teh lakam ia ka jingksam um shapoh ramew da ki riew shimet, kaba la jyllei bha ha kine ki sngi ba mynta. Ka jingksam um shapoh khyndew kadei kawei na ki daw kaba pyntyrkhong ïa kiwei pat ki tyllong um kiba don marjan. Ka jingshah pynjaboh jong ki wah ha kine ki sngi ba mynta, kadei kaei kaei kaba isaitmet, ha kaba ki um ki wah ki la kylla long ki jaka bret jaboh jong ki briew bad ki jaka pyntuid nala jong ki ïing ki sem. Kaei kaba la jia ïa ka wah Umkhrah, wat hapdeng bun ki jingmana jong ki bor sorkar, hynrei kane ka wah kaba ha ki por mynshuwa ka long ka wah kaba dang ïasum ïasleh bad ïasait ïakhlieng, kam shym la I paw dak eiei ba kan wan biang sha ka jingkhuid jong ka juk ba mynshuwa. Lehse, lyngba ka jingwanrah da ka Water Policy yn lah ban ïada ïa kiwei kiwei pat ki wah kiba don hapeng ka jingma ban kylla long kum ka Wah Umkhrah.
Nangta shuh shuh ka jingpyndonkam pathar ki briew ïa ki um ki wah, khlem da lah ban tyngkai ne kynshew, ka long ruh ka daw kaba wanrah ïa ka jingduna um ha kiwei pat ki jaka ba duna um lane ka jingbym lah ban wanrah ïa ka rukom sam um ha ka rukom kaba mar ia marryngkat. Lyngba ka Water Policy lehse kan lah ban pynbeit ïa kine kiei kiei baroh.
Kyrmen ba kane ka sorkar ba mynta haba ka la sdang khih ban pyntreikam ïa kane ka Policy, kan nym long kum kiwei kiwei pat ki Policy ha ka jylla kiba la shu sahkut sah da ki bun bun snem khlem da lah pyntreikam satia.
Mynta ba ka Cabibet ka ladep ban mynjur ïa ka Draft Policy, ka long kaba donkam pat ban pynkloi ha kaba pdiang bad mynjur noh ïa ka hapoh ïingdorbar Thawaiñ, khnang ban ïoh ban pyntreikam noh wut wut. Ka Water Policy kam dei ban long kum kiwei pat ki Policy kaba shu sahkut sah ha ka kti jong ka sorkar ban shu pan jingmut sah na ki paidbah. Hynrei dei ban wanrah noh wut wut bad lada donkam ban pynbha sa nang pynbha kham hadien. Kaei kaba donkam mynta ka long ka jingpyntreikam shuwa, khnang ba kan long ka jingmyntoi ïa ki paidbah bad ba kan ïarap ban tyngkai ïa ki um ki wah.