Press "Enter" to skip to content

Pynkhreh ka Laitkseh SC ïa ka 1st Baby League Football Tournament

Wer ïashim bynta ka MFA sha ka MBL ïa ki kynhun ka Smit bad Mawngap

Nongstoiñ, Naitung 15: Ka Laitkseh Sports Club kaba la long mynta kawei na ki Synjuk Football ba la bna nam kylleng ka Jylla, kan pynkhreh pat mynta ïa ka 1st Laitkseh Baby League Football Tournament ka ban sa sdang naduh ka taiew ba khatduh jong u ne u bnai. Kane ka tournament kan pynialehkai beit tang ha ki sngi saitjaiñ bad ha ki sngi shuti.
Katkum ka kyrwoh ba la phah da ki nongpynïaid, la ong ba kane ka 1st Laitkseh Baby League ka dei kaba la pynïasoh ryngkat bad ka Meghalaya Football Association. Ka jingthmu hi ka long ban ïit bniah bad sei ïa ka sap ka phong ïalehkai jong ki khynnah rit ka thaiñ West Khasi Hills naduh ba ki dang rit karta. Kane kan ïarap ïa ka lawei jong ka football bad kan kyntiew ruh ïa ki khynnah ïalehkai football naduh ka arta ba dang rit, ong ki nongïalam ka Synjuk.
Na ka liang ka synjuk ka don mynta hapdeng ka jingpynkhreh pynkhrum na ka bynta kane ka lympung ba nyngkong. Ka la phah ruh ïa u kyrwoh sha baroh ki Sports Club, ki kynhun bapher bapher, ki skul bad kino kino kat kiba kwah ban shim bynta, ba kin pynbiang lypa noh ïa ki jingdonkam baroh. La pyntip ruh ba kawei pa kawei ka Club ne kynhun ka dei ban pynbiang ne pynïoh lai tylli ki team ha ki lai tylli ki karta ne age group, kata ha ka Under-9, Under-11 bad Under-13. Na ka bynta ki jingtip ba kham bniah la kyrpad ruh ban phone ha u 7005730236 bad 9862195927.
Ha kawei pat ka khubor, ka Meghalaya Football Association, ka la shim ïa ka sien jam ba kan bteng ïa ka jingkhot ïashim bynta ïa ki skul, ki kynhun, klob ne ki shlem ai jinghikai kiba don ha ki shong kum ka Smit bad Mawngap, ba kin ïa wan lem shakhmat ba kin ïa sei madan ïa la ki kynhun ki jong ki ban ïashim bynta sha ka lympung ïalehkai jong ka Meghalaya Baby League 2019.
Ka jingpdiang ïa ki kyrteng ïa ki nong ïashim bynta kan plie naduh mynta ka sngi ka 16 tarik bad kut ha ka 19 tarik, ïa ki jingtip kham bniah ki lah ban ia kynduh ia ki nongtrei ba don ha ophis treikam jong ka MFA naduh ka por 1 baje nohphai sngi haduh 5 baje janmiet ne ki lah ruh ban shu email [email protected]