Press "Enter" to skip to content

Ah! Sangsot ïa ka surok kaba don tang 10 Kilometer na Nongstoiñ

Nongstoiñ, Rymphang 19: Ka shnong Risiang, ka shnong kaba don ha lynti ban leit sha Maweit kaba jngai tang da ki 10 kilomiter ei ei na ka sor Nongstoiñ ka dei ka shnong kaba long pdeng bha na ka bynta ki 15 tylli ki shnong ba marjan. Hynrei sangsot ban peit ïa ka jinglong jingman ha ka liang ka roi ka par khamtam eh ka jingsniew ba la palat liam jong ka surok.
Ki 15 tylli ki shnong ba marjan ki kynthup ïa ka shnong Mawpon, Nongmynraw, Maweit Ksar, Mawlangriang, Riangpoit Thymmai, Riangpoit Rim, Bri ïawnoh, Mawkynjoiñ, Nongkaniang, Lyngdoh, Mawlait, Mawriat, Nongtraw, bad ka Umthli. Hynrei wat haba katei ka shnong kam da jngai than na Nongstoiñ, pynban ki paid nongshong shnong ha katei ka thaiñ ki shem jingeh shibun ha ka leit ka wan khamtam haba ki mad ïa ki jingshitom jingpang namar ka jingsniew palat ka surok.
Kumban shu pynkynmaw ba ha u snem 2000, ki rangbah shnong jong kitei ki 15 tylli ki shnong da kawei ka sur ki ïa tylli bad ki la ai da ka jingthoh ban kyrpad ban pan ïa ka sub center ha katei ka thaiñ da kaba jied ruh ïa ka shong Risiang ban buh ïa ka. Na ka liang synjuk ka la pynwad jaka ruh na ka bynta ban thaw ïa ka ïing bad la dep ban ai ruh ïa ki jingthoh jingtar kiba biang sha ka tnad jong ka koit ka khiah haba ïadei bad ka dulir. Na ka liang jong ki bor kiba halor ruh ki la wan ban jngoh ïa ka jaka bad la rai ruh ban ai noh. Pynban kat haduh mynta mynne ka jingkular kaba la khlei kam shym la urlong satia.
Haba ïakynduh ïa ki katto katne ngut na kitei ki nongsynshar, ki la pynpaw ïa ka jingbynñiaw kaba jur namar ka jingpynslem jong ki bor kiba halor ban pyndep ïa ka juban lak ïa kaba la ïakut naduh ki snem kiba lah dep haba mynta katei ka jingkular ka kynjoh sha ki 20 snem duna.
“Ngi diaw mynsiem haba hateng hateng ka lah don ruh wat ka jingïap briew ha ki surok ki syngkieng tang namar ba ki longkmie kiba armet ki ïabeh ban leit phah sumar sha Nongstoiñ. Pynban haba sniew than ka surok ki khlad noh ha lynti. Hynrei lada don noh ka sub center, kan jin da la long ka jingmyntoi bad ka jingkyrkhu kaba khraw ïa ngi”, ong u Bah Stephan Marthong Rangbah shnong Risiang bad bynrap “Ngi na kane ka thaiñ ngi la ïaid paidbah bun bun sien ban pynpaw ïa ka jingdonkam hynrei ym don ba patiaw ei ei. Hooid ngi lah ud ruh ha ki nongmihkhmat hynrei kim shym la patiaw”.
Kumban shu pynkynmaw katei ka surok kaba leit sha Maweit ka dei kawei na ki surok kaba lah rim tam ha ka Jylla, namar ka dei ka surok kaba lah shna naduh ki por jong ka jingsynshar ka sorkar Assam. Ka jingsniew jong katei ka surok ka lah long shaba palat kat haduh ba ka JAC hapoh ka jingïalam jong u samla Ben Hahshah bad u samla Ïoannis Diengngan ha ki snem kiba lah dep ki lah pynlong ïa ka jingkhawai dap 50 snem ha ka jingsniew ka surok kum shi bynta ban pynrem ïa ka sorkar da kaba ki lah ot ruh da u Cake. Phewse kita baroh ki la shu pulom kai namar ka jingkyllut ka sorkar.