Press "Enter" to skip to content

Bthah ka Tnad Pulit ïa ki ‘Flying Squad’ ban ïarap ïa ki kali kit nongpang

Shillong, Naitung19: Ka Tnad Pulit jongka East Khasi Hills kala bthah ïa ki Pulit’Flying Squad’ ba kin ai ka jingiarap ïa kino kino ki kali ba kit nongpang lada ki sahkut ha ka jingdheng kali.
U Superintendent of Police (City) u pyntip ba kino kino ki kali ba kit nongpang ban ïoh ïa ki jingsumar ba kyrkieh, lada ki sah kut ha ka jingdheng kali ba kin pan ïa ka jingiarap na ki ‘Flying Squad’ ba don marjan, ki ban synran sha ki Hospital ba marjan.
Ka Tnad Pulit kala buh ïa ki ‘Flying Squad’ ne ki Pulit pynïaid kali ba ïaid da ki thuk thuk ha kylleng ki jaka ba don ka jingdheng kali ban pyllait kloi ïa ki kali bad ban bat ne ai jingpynshitom ïa kito ki nongniah kali kiba ïaid tam pud ne pynkheiñ ïa ka aiñ niah kali.
Ka jingdheng kali ka dei kawei ka jingeh kaba ki paidbah kila
ngiah hi shoiñ ha ki surok ka Nongbah Shillong bad ha khapsor ruh kumjuh. Ka jingdheng kali kaba da pynjlep hi thui ka dei ka jingdheng ha ki surok ba rung sha Nongbah Shillong kum ha Mawlai Petrol Pump sha Mawiong, Upper Shillong bad Nongthymmai-Madanrting khamtam ha ka por janmiet haduh ba ki Pulit pynïaid kali kila iatakhuh mawsiang ban weng ïa kane ka jingeh.
Ka Sorkar Jylla ka khmih lynti ba da ka jingplie noh ïaka Mawlai Bye-Pass kan sa iarap ban pynduna ïa ka jingdheng kali ha ka surok u Tirot Sing Syeim Road (Mawlai-Mawiong) bad kumjuh ruh ka Western Bye-Pass ba ïaid na Mawmaram sha Mawlyndep ka ban pynduna ïa ka jingdheng kali ha ki thaiñ Upper Shillong.
Lah ban kdew hangne ba ka Sorkar kala buhthong ban plie noh shen ïa ka surok Mawlai Bye-Pass kaba la pyndep mynta nadong hadong.