Press "Enter" to skip to content

Hato kut ‘Ka Cabinet on the Move’ tang ha Tura?

Ka Sorkar Meghalaya Democratic Alliance (MDA) ba lamkhmat da ka National Peoples Party (NPP) kala thaw histori ha ka Jylla da kaba rai ban pynlong ïa ki jingïalang jongka Kynhun Myntri ha manla ki District ka Jylla (Cabinet on the Move) ka bym pat ju jia koit ha ka Jylla naduh ba ïoh ïa la ka jong ka Jylla ba pura. Ka ‘Cabinet on the Move’ ka dei ka sienjam kaba biang eh ban rah ïa ka Synshar Khadar shajan jong u paidbah ka Jylla ym shuh ban shu kut haba pyrkhat kam tang na Nongbah Shillong.
Ka Sorkar kala sdang ia ka ‘Cabinet on the Move’ myn ha ka 10 tarik Jylliew da kaba pynlong ia ka jingialang ba nyngkong eh ha sor Tura, kaba dei ka jaka pdeng jong ka Ri-lum Garo bad ha kane ka jingialang, ka Sorkar kala shim ia ka rai ban nang iai pyntyllun shakhmat ia kane ka sienjam sa sha kiwei pat ki District ka Jylla kum ha Jowai, Khliehriat, Mawkyrwat, Nongstoin Nongpoh, Williangnagar, Bahmara, bad Ampati. Ka jing ïalang ha Tura kam da i seisoh satia kumba la thmu ne kata ka jingrah ïa ka synshar khadar shajan u paidbah kala urlong namar ki mat ba la ïakren bad ki rai kiba mih na ka jingïalang ki dei beit jong ka Jylla baroh kawei bad ym don wat tang kawei ruh ka rai kaba mih na ka bynta ka West Garo Hills ne ka Ri-lum Garo.
Ka jingleit jong ka Kynhun Myntri sha Tura kala don hi khyndiat ka jingmyntoi da ka jingshimkhia tang jong ki katto katne ngut ki Myntri Sorkar (ym baroh) kiba la lum ïa ka jingïalang bishar kam (review) bad ki Ophisar jong ka District nalor ka jingleit jurip ïa ki prokram bad ki skhim ba ka Tnad ka pyntrei ha kine ki District. Katno ngut na ki 11 ngut ki Myntri Sorkar kila leh ïa kane ha ka jingleit shong jingïalang shaduh Tura?. Hato kiba bun ki Myntri ki shu hun beit mo ïa ka jingshakri jong ki Tnad bad sngew ba ym donkam shuh ban iabishar kam ne tuklar ïa ki jingdkoh treikam jong ki Tnad ha ki District. Ka jingiaroh ka long ïa ki katto katne ki Myntri Sorkar kiba la pyni shisha ïa ka mynsiem ban shakri na ka bynta ka bit ka biang jong ka Jylla baroh kawei.
Ka jingiaroh ka leit ruh sha ka Sorkar Meghalaya Democratic Alliance (MDA) kaba la shim ïa ka rai ha Tura, ban bynshet ha uwei pa uwei u Myntri Sorkar ba kin khmih ïa kawei pa kawei ka District ha ka shisnem. Ka kam bala bynshet ka long ba kine ki Myntri Sorkar na ka por sha ka por kin leit iuhkjat ha ki District ba ki khmih bad ba kin lum kin lang ïa ki Ophisar Sorkar na ki tnad bapher bapher ban shong bishar ïa ki kam ba ki trei hapoh ki District. Kane ka rai ka pyni ïa ka jingïohi jngai jong u Myntri Rangbah ka Jylla uba la ïohi ïa ka jingdonkam ban don ki nongkhmih nongpeit ba kyrpang ïa ki District ba kin kiew shakhmat ha baroh ki liang khamtam ban lah pynthikna ba ki prokram bad ki Mission jong ka Sorkar Jylla kin tyllun ryntih ha baroh ki District ka Jylla.
Ka jingïalang bishar kam (review meeting) hi ka dei kaba donkam bad ba kongsan bha ha ka jingshakri jong ka Sorkar Jylla ïa u paidbah bad khlem kine ki jingïalang, ym nang ban ong la ki prokram ne ki kam pynroi jong ka Jylla ki tyllun hok ne em kumba la khmih lynti. Ym lah pynthikna ruh la kine ki prokram ki poi ne em sha u paidbah?. Ka Sorkar Jylla ka dei ban sngewthuh ïa ka jing donkam ki jingïalang bishar bad ka dei ruh ban pynlong kongsan ïa kum kine ki jingïalang ha manla ba ka leit pynlong ïa ka jingia lang jong ka kynhun Myntri ha manla ki District Headquarter. Baroh ki Tnad Sorkar ki don ïa ki jingduna bad jingbym biang suda ym ba baroh ki biang lut nadong hadong khamtam lei haba ïohi ïa ka Work Culture (rukom treikam) jong ki Nongtrei Sorkar kiba trei hala ka mon hala ka jong ka jingsngew bit khlem ka jingpyrkhat ïa u paidbah.
Kawei ka rai kaba mih na ka ‘Cabinet on the Move’ ha Tura ka long ba ka jingialang ban wan jong ka kynhun Myntri kan long noh ha sor Jowai hynrei hadien ka 10 tarik u Jylliew, ka Jylla kala ioh ia artylli ki jingialang jong ka kynhun Myntri bad baroh kine ki jingialang kila long ha Secretariat, Nongbah Shillong..lah klet noh ia ka rai ban pynlong ha Jowai ne kiwei kiwei ki District. Lehse ka Sorkar MDA kala sngew ktah ia ka jingkynthoh ka Congress ba don ha Liang Pyrshah haba ka ong ba kam don jingphoi da ka jingleit pynlong jingialang jong ka jingkynhun Myntri ha ki District namar ia ki rai leh ban shim nangne na Nongbah Shillong ruh. Kawei pat ka jingkynthoh ka long ba ka Sorkar ka shu pynsyrwa kai ia ka pisa u paidbah bad shu pynlut phut tang namar kane ka rai ba khlem don jingmut.
Kawei ruh ka jingkylli kaba mih mynta ia ka Sorkar ka long halor ka rai ban thung ia uwei pa uwei u Myntri ba kin khmih ia kawei pa kawei ka District na ka bynta ka roi ka par bad ba kin pynlong ruh ia ki jingialang bishar kam ia ki rukom treikam jong ki Tnad Sorkar. La palat shibnai ka por kala iaid naduh ba shim ia kane ka rai hynrei haduh mynta dang jar jar bad pat iohi dak satia ba kan treikam. Hato ka Sorkar ka shimkhia shisha mo ban leh ia kane? kan don jingeh aiu ban shu bhah kam ia ki Myntri ne dei ba ki pyneh ki Myntri ne ba pynlong ia u Myntri Rangbah ka Jylla ban nym nud bhah kam haduh mynta.