Press "Enter" to skip to content

Hiar jurip ka Addl. DC ba shong synjor ka Ïew dielang ha Ïewduh

Shillong, Naitung, 19: Ka Additional Deputy Commisisoner jong ka East Khasi Hills District ka Kong I. Majaw mynta ka sngi thohdieng ka la hiar jurip kyrkieh ïa ka Ïew Dielang ba la shna da ka Ophis jong u Syiem ka Hima Mylliem ha Ïew Duh, Shillong hadien ba ka ujor ka la poi sha ka miej jong ka Deputy Commissioner ka East Khasi Hills District dang shen ba kane ka jingtei ka shong synjor bad buh ïa ki nongshong ïew ha ka jingma.
Ka Kong I. Majaw kaba long ruh ka CEO jong ka District Disaster Management Authority (DDMA) tang shu iuhkjat ha Ïew Dielang ka la tohkit bniah bin pa bin ïa ka rukom shna ïa kane ka Ïew Dielang na ki Myntri ka Hima Mylliem katkum ka ujor ba kane ka jingtei ka la buh ïa ka jingim jong ki nongshong ïew ha ka jingbym shngaiñ.
U Bah Roberrt S Kharbuki, u Myntri ka Hima Myllliem ha ka jingïakren bad ki nongthoh khubor hadien ka jingjurip ïa kane ka jingtei u la ong, “baroh ka dei tang ka jingbishni bad naduh ba sdang dei ma ki (para Myntri ki bym don ha ka bor) bad kaei ka plan kaba ki leh ngim lah satia ban batai ïa ka kam kaba long Technical bad naduh kaba sdang la tei ïa kane Parking Lot da ka jingai jingbit jong ka District Council bad shwa ban ai jingbit ka District Council ka la phah ruh da ki Engineer ban jurip bniah.”
“Katkum ka jingujor ki kynnoh ba ka jingtei ka long ka bym shngaiñ,,” ong u Myntri Kharbuki bad bynrap, “shwa ban sdang ïa ka kam ngi la ïaid lyngba ki Engineer bad shwa ban tei ïa ki dukan kiba shalor ngi la phah jurip thikna la ka lah neem ki païa kiba napoh ban kit ïa ka bynta kaba shalor.”
U la ïathuh ba ka CEO jong ka DDMA kan sa phah ïa ka kaiphod tohkit sha ka Deputy Commissioner bad ban sa pyntip pat sha ka Ophis jong u Syiem ka Hima Mylliem.
“Ngin hap ban ïakren da kaba sngewthuh lada shna ïa kano kano ka projek,” u la bynrap.
Haba kylli u la ong, “kiba bishni ki dei ki para Myntri ki bym don ha ka bor. Nga shu sngewtieng ba lada kim don ha ka bor kin shu ujor shi ujor bad lada dei ma nga ngam don ha ka bor ruh ngan leh ïa kajuh.”
Na ka liang u Myntri Kharkongor, haba kynthoh halor kane ka jingtei ïa ka Parking Lot ha Ïew Dielang u la ong, “ngi hap ban ujor katkum ki daw kiba biang, namar naduh ba la shna ïa ka bynta kaba shakhrum ka la mih nyngkong eh ka jingujor na ki nogshong ïew ha u snem 2018 bad mynba nga dang peit kum u Myntri jong ka ïew ngi la wan jurip bad ka jingpynieng ïa ka slep ka long tang halor ki nar rod ba tang 12 mm.”
U la ïathuh ba ha ka por ba dang long Acting Syiem u Pa’iem Ricky Nelson Syiem, ka ophis jong ka Hima Mylliem hadien ba la ïoh ïa ka skhim na ka District Council ka la bthah ïa u Kontraktor tang ban shu tap da ka tin ïa ka bynta kaba shalor ka mala khnang ban ïada ïa ki nongshong ïew na u slap bad ka lyer.
“Hynrei ka jingtei kynsan kynsan mynta ïa kane ka jingtei kaba heh da ka slep dewbilat ngi ïohi ba ka buh ïa ki paidbah ha ka jingma. Kane ka dei ka ïew bad lada jia kano kano ka jingjia, bun ki mynsiew briew kin duh ei bad ka jingkitkhlieh kan dei sha ngi ki Myntri,” u la ong.
U la ïathuh ba ki para Myntri kim banse ban ujor sha ka DDMA bad leit ïakynduh ruh ïa u Acting Syiem ka Hima Mylliem ba mynta u Pa’iem Ainam M. Syiem ban pan jingshai halor ka jingpynkha ïa ki dukan shalor ka slep dewbilat.
“Wat hapdeng ka jingpynsngew, u Acting Syiem um pynsngew bad dei na kata ka daw ngim banse ban leit ujor,” u la ong. U la ong ba ki para Myntri kin ym shongthait ban buddien halor kane ka jingtei. “Lada ki ong ba ngi bishni ngim don eiei ban kren hynrei ngi ujor katkum kaei kaba ngi lap,” u la ong.
“Ha kato ka por, ngi dang pyrkhat ban shna ïa kane ka jaka ban pynieng kali shapoh khrum bad ban ailad ïa ki nongshong ïew ban shong ïew die lang noh shalor, hynrei mynta pat ki mih kynsan pynban da ki dukan,” la kynthoh u Myntri Kharkongor.
U la ïathuh ba kane ka kynhun ki Myntri kin ap ïa ka kaiphod na ka ophis jong ka Deputy Commissioner shwa ban ïaid shakhmat halor kane ka kam.’