Press "Enter" to skip to content

Ïoh jingmyntoi ki 200 ngut ki samla pule na ka ‘Aspire Meghalaya Programme’

Nongpoh, Naitung 19:  Kumba 200 ngut ki samla pule jong ka Ri Bhoi Presbyterian Higher Secondary School, Nongpoh ki la pyndep ïa ka prokram kaba 10 sngi kaba dei halor ka, ‘Soft Skills, Career Readiness, Talent and Aspiration Identification’  ha ka ktien Nongwei bad ka jingthmu lyngbakane ka prokram ka long ban pyntbit ïa ki samla pule halor ki sap ki phong ba ki don bad khamtam ba kin mih shakhmat khlem kano kano ka jingtieng ne jingsmiej ban pynpaw ha la ka sap kaba ki don ha ka jingim.
Kane ka prokram ba la pynlong ha RBP Higher Secondary School, ka dei ruh shi bynta kum kata ka prokram ba la tip ka Aspire Meghalaya initiative lane ka prokram kyrpang ka sorkar Meghalaya (flagship programme) na ka bynta ban saindur ïa ka lawei ki khun samla ha ki skul bapher bapher ka jylla, ha kaba la pynlong da ka AVENUES, Shillong ryngkat ka jingiatei lang jong ki skul
bapher bapher na ki 8 tylli ki district.
Kane ka jaid prokram ba la pynlong ne pyniaid da ka Avenues, Shillong ka dei ruh ka prokram ba kaba la mang tyngka lyngba ka Ministry of Tribal Affairs  ha ryngkat ka jingiatrei lang na ka Department of Arts & Culture, jong ka sorkar jylla.
U Myntri Rangbah ka jylla, u Conrad K. Sangma u la wan ruh ban shim bynta ha ka jingpynkut noh ïa kane ka prokram kum u kongsan bad ka Deputy commissioner ka Ri Bhoi ka Kong R.M Kurbah kum ka symbut kongsan ryngkat ka jingdon lang u Managing Director ka Avenues, u Mark Stone Laitflang, u Principal ka RBP Higher Secondary School, u Bah W. Radu bad kynthup ruh ki khynnah skul bad ki nonghikai.
Haba pynkut noh ïa kane ka prokram mynta ka sngi, la sam ruh ïa ki khusnam ne ki syrnot sha kito ki khynnah pule kiba la shim bynta ha kane ka prokram bad na ka liang u Myntri Rangbah ka jylla ruh u la pynlait paidbah ïa ka Official Textbook kaba èa dei bad ka Aspire Meghalaya Programmes.
Haba kren kum u kongsan ha kane ka sngi, u Myntri Rangbah ka jylla, u Conrad K. Sangma u la ai ki jingkren ba ai mynsiem ïa ki khynnah pule bad u la ban khia ruh ba kum ki samla ne ki samla pule ki dei ban don ïa ka sap kaba kyrpang la ka dei ha ka pule ka puthi ne ha kiwei kiwei ki jaid kam khnang ba kin ioh ïa ka lawei kaba phyrnai.
U la ai ruh ka jingiaroh ïa ki samla kiba la shim bynta ba kim don kata ka mynsiem lehrain ne kynran dien bad u ai mynsiem ruh ba ki dei ban don kata ka jingnoh synniang na ka bynta lade, ka ing ka sem, ka imlang ka sahlang bad kumjuh ruh ha ka jylla bad ha ka ri hi baroh kawei.
U la pynpaw ruh halor ka jingdonkam ba ka jylla ka donkam ïa ki samla kiba don ka jingkyrmen ban tei na ka bynta ka bha ka miat jong ki paidbah ha ka jylla bad ka sorkar ka khmih lynti ruh kumba 4000 ngut ki samla na ka jylla lyngba kane ka prokram kin ioh ïa ka jingsngewthuh kaba paka na ka bynta ban ïada  ïa ka mei mariang lane ka pyrthei kaba ngi im ki sah.
U Myntri Rangbah ka Jylla u Conrad K. Sangma u la ai khublei ïa ka Team Ribhoi ba la ïalam da ka Deputy Commisioner bad ki Ophisar jong ka tnat ka Koit ka Khiah bad ka tnat Social Welfare halor ka jingïoh ïa ka kyrdan banyngkong eh napdeng kiwei kiwei ki District ha ka ri ha ka jingai kyrdan jong ka NITI Aayog na ka bynta u bnai Jymmang, 2019.
Ka Deputy Commissioner ka Ri Bhoi, ka Kong R.M Kurbah haba kren ha kane ka sngi ka la pynpaw ka jingkmen haba don kum kine ki jaid prokram, namar lyngba kane ka prokram kan iarap ïa ki samla ba kin mih shakhmat  ban long kita ki nongialam na ka bynta ka imlang ka sahlang.
Ka la ong ruh ba dei ha kum kine ki prokram ngi lah ban lap ïa ki sap ki phong ki samla bad kaba ai ruh ka jingpynshlur ïa ki samla ba kin sei ïa la ki sap ki phong ba ki don khlem ka jingtieng ne jingsmiej bad kaba don ruh ka jingkyrmen na ka bynta ka lawei jong ka imlang ka sahlang.
Kawei na ka nongshim bynta ha kane ka prokram, ka Devika Sohkhwai ka la pynpaw ba ka la kham tbit ha kaba kren English bad kumjuh ruh kumno ban don ka jingiadei ha ka imlang ka sahlang, hadien ba ka la ioh ka jinghikai na kane ka prokram.