Press "Enter" to skip to content

La plie ïa ka jingkieng Borghat ba pynïasoh bad Dawki

Ki jingkylla kin wan,long kiba la pynkreh: Prestone
Borghat(Khliehriat) :Ka jingkieng ha ka wah Tisang (Myntdu) ka dei ka jingkieng kaba la sdang ban trei naduh u snem 2011 bad ka dei ka jingkieng kaba pynïasoh ïa ka shnong borghat kynthup ki thaiñ khappud jong ka East Jaintia bad ka West Jaintia shaduh Dawki,katkum ka mang tyngka la mang T.1660.21 klur,kata (14/05/2010..Date of Comemceent),katba u Chief Engineer ka PWD,u bah L.D.Suchiang pat u la pynpaw ba ka jinglut ka la kot shaduh 26 klur tyngka.Ia kane ka jingkieng mynta ka sngi la wan ban plié da u myntri ka tnat PWD,uba dei ruh u Deputy Chief Minister,u bah Prestone Tyngsong ha kaba u la ong ba nangne shakhmat ki jingkylla kin wan bad kyntu ia ki paidbah jong ka thaiñ khappud ban long kiba la pynkhreh ban long kiba trei shitom ban nang kiew shuh shuh ka thaiñ.
U bah Prestone Tyngsong,kum u kongsan u la ong ruh ba ka sorkar bunsien ka ju ïa kynduh jingeh bha ha kaba iadei bad ka jaka namar ka sorkar kam don jaka ka hap ban shu pan na ki briew shimet,u la kyntu ban long kiba kylluid mynsiem
U la ïathuh ruh ba yn sa ioh shen ïaka mang tyngka kaba 2 hajar klur kaba dei jong u snem 2018-2019 na ka sorkar pdeng bad kumjuh ruh na ka sorkar jylla,la ong ba lyngba kane ka 2 klur ka sorkar kan sa shna pynbha ïa ki surok ha ki thaiñ khappud kaba kynthup naduh Borghat ter ter haduh Sonapur bad haduh Hingaria-Huroi “Kan sa long ka jingmyntoi bad ka jingkyrkhu ïaka thaiñ kahppud ha kaba ïa ki mar rep yn sa lah ban pynpoi sha ki jaka iew ba dei ban pynpoi ym shuh sha Bangladesh kumba ju long bad kan sa don ka jingkiew shuh shuh ha ka liang ka ïoh ka kot jong ki briew ka thaiñ”u la ong.
U la iathuh ruh ba “Ngi dang pynkhreh ïaka mang tyngka bad nga ngeit ba kan nym slem shuh ba ngin ioh bad ynda la ïoh ngin sa sdang noh shen ban shna ïa ki surok kiba long katkum ka jingpan u ma L.Rymbui kaba naduh Dawki (Land Custom Station) haduh Muktapur ter ter bad naduh Amlarem ter ter,kumjuh ruh katkum ka jingpan u ma Kyrmen Shylla kaban long ter ter shaduh Rymbai bad ong ruh ba ka sorkar ka la don jingmut ban pynheh shuh shuh ïa kane ka surok ban pynlong kum ka Double Lane ne ka Intermediate Lane,u kyntu ïa ki paidbah ban long kiba kylluid mynsiem lada ka sorkar ka donkam ïaka jaka bad hangta yn sa iohi ïa ki jingkylla ha kaba kan don ruh ka jingkiew ha ka ïoh ka kot,ha kaba kan sa don ruh ka jingmyntoi ha ka liang ka kam jngohkai pyrthei.
U la iaroh ïaka jinglong shida ki briew jong ka thaiñ bad ka jingtrei shitom jong ki bad pynpaw ruh ka jingsngew khia halor ka jingshah iehnoh beiñ ki briew jong ka thaiñ khappud,u la ïathuh ba na ka liang ka sorkar kaba hapoh ka jingïalam u Conrad Sangma kum u myntri rangbah ki la dep draw ïa ka map ban ïarap ïa ki paidbah ha kaba la jied ïaka thaiñ khappud kum kawei ka bynta kata ka long ban pynbha pynbit pynbiang noh ïa ki surok “Bad hangta phin sa ïoh ka jingkylla ka ban long ka jingkyrkhu”
U la kyntu jur ruh ïa ki paidbah ba kin nang pynneh ïaka jingjyrngam ka mariang kumba ka long mynta khnang ban khring ïa ki nongjngohkai pyrthei na kylleng.
U bah Lakmen Rymbui,myntri ka tnat khlaw,u la ong ba ka thaiñ khappud ka dei ka thaiñ kaba riewspah ha ka spah mariang bad ka la i donkam ban nang iai kyntiew shuh shuh ha ka liang ka ïoh ka kot jong ki paidbah,u la ai khublei ïaka sorkar MDA jong u Conrad Sangma ba hapoh kane ka sorkar la lah ban pyndep haduh saw tylli ki jingkieg ha ki thaiñ khappud bad mynta dang khmih lynti ban ïoh sa ka surok kaba bit ba biang lyngba ka skim jong ka World Bank.
U la buh ka jingkyntu ïa ki paidbah ba kin nang ïai pynneh ïa kane ka mariang ba jyrngam kumba ka long,namar kumba long ka Wild Life ha Sonapur,ha kaba ka ju khring bunsien ïa ki nongjngohkai pyrthei lyngba ki khlaw kiba rben kiba itynnad.
U D.C Chaudhury,Contractor M.H.R uba pyntrei ïaka jingkieg ha Borghat (wah Tisang),u la iathuh ba u la ju kynduh bun ki jingeh ha kaba kane ka jingkieng ka la khyllem ar sien ba shah rah ha ka um,wat la katta ruh um duh jingkyrmen hynrei dei ha une u snem la lah banpynurlong ïa kane ka jingkieng kaba jrong haduh 180 miter.
U Y.K.Roa,General Manager jong ka NABARD u la ong ba kane ka jingkieng ka long ka jingkieng kaba phyla ha kaba wat hadeng shibun ki jingeh ba ki ïa kynduh hynrei la lah ban pynieng pat ïaka,u la ong ruh ba kane ka jingkieng kan iarap ruh ïa ki shipai Border Security Force ban ïaid phara.
U bah Kyrmen Shylla,u la ong ba kane ka jingkieng ha Borghat ka long ka lad ban nang pyniajan shuh shuh ïa ki ar tylli ki District kata ka West Jaintia Hills District bad ka East Jaintia Hills DSitrict ha kaba kane ka jingkieng ka long ka jaka pdeng jong kitei ki ar tylli ki District.U la kyntu ïa ki paidbah ban long kiba ïatreilang bad ka sorkar “Dei lyngba ka jingiatreilang yn sa lah ban wanrah shibun ki jingkylla”u la ong.
Kiba la ai jingkren ki kynthup ruh u bah Shitlang Pale,MLA Sutnga-Saipung uba dei u MLA ka thain,u bah L.D.Suchiang,Chief Engineer PWD bad kiwei kiwei.
Ha kane ka sngi la ïa wan ruh ban ïashim bynta ha kaba plié ïa kane ka jingkieng da ki nongshongshnong ba marjan,kiba na ka shnong Kwator,Natbor,Lumpyngngad,Karkhana bad kiwei kiwei ki shnong na khapppud.La pynbyrngia da ki jingrwai bad jingshad na ki khynnah skul na Borghat.