Press "Enter" to skip to content

Mynjur ka Kynhun Myntri ban pynim biang 3 tylli ki Ordinance

Shillong, Naitung, 19: Ka Kynhun Myntri jong ka Sorkar Jylla mynta ka sngi thohdieng ka la mynjur ban pynjari biang haduh lai tylli ki Ordinance kiba la ïap hadien ba ka Sorkar kam shym la ïohlad ban rah ïa kine ki Ordinance hapoh ka Iingdor Thawaiñ jong ka jylla namar ka jingwan kyndit jong ka elekshon Lok Sabha.
Kine ki lai tylli ki Ordinance ba ka Kynhun Myntri ka la rai ban pynim ki kynthup ïa ka Court Fees (Meghalaya Amendment Ordinance), ka Meghalaya Electricity Duty Amendment Ordinance bad ka Meghalaya Building and Others Construction Welfare Board Ordinance.
U Myntri ka tnat Kam Pohiing ka Jylla u James PK Sangma ha ka jingïakren bad ki lad pathai khubor u la ong, “ka Sorkar Jylla ka la hap ban pynim biang ïa kine ki Ordinance namarba Sorkar ka la dep mynjur pynban kam shym la lah pat ban rah ïatai hapoh ka Iingdorbar Thawaiñ ka Jylla ban ïoh jingmynjur namarba la hap ban pynlyngkot noh ïa ki sngi shong Dorbar namar ka jingwan ka elekshon Lok Sabha.”
U la ong, katkum ki kyndon aiñ la hap ban pynim biang ïa kine ki Ordinance bad la shim ruh ïa ki jingai jingmut na ka tnad Aiñ shwa ban pynim bad ban pyntreikam ïa ki.
U la ïathuh ba ka Kynhun Myntri ka la ai jingmynjur ruh ban pynkylla thymmai ïa ka ‘Financial Powers’ jong u State Officer ka tnad General Administration Department (GAD) ha kaba mynta u State Officer uba don ha ka kyrdan Executive Engineer jong ka GAD un don ïa ka bor ban mang bad pyllait ïa ka pisa ba kot haduh 2 lak tyngka namarba baroh shikatta la pynkup bor ha u ban mang bad pyllait tang haduh 1 lak tyngka.