Press "Enter" to skip to content

Na ka tulop yn synñiang ki Myntri Sorkar sha ka CMRF ban ïarap ïa ki lanot shlei um

Ïasnohkti lang phi ruh ki paidbah; ong ka Sorkar Jylla
Shillong, Naitung 19: Ka jingïalang jong ka Kynhun Myntri ka Sorkar Jylla mynta ka sngi thohdieng ka la shim ïa ka rai ba ki Myntri ka Sorkar Jylla kin han ban don bynta ban noh synniang ‘kylluid mynsiem’ sha ka Chief Minister’s Relief Fund (CMRF) na ka bynta ban ïarap ïa ki lanot shlei um ha ka Jylla.
“Baroh ki Myntri Sorkar kin hap ïa don bynta lang ban noh synniang sha ka CMRF,” ong u Myntri ka tnat Kam Pohing ka Sorkar Jylla ha ka jingïakren bad ki lad pathai khubor hadien ka jingïalang Kynhun Myntri.
U Myntri u la kyntu ruh ïa ki nongshong shnong ka Jylla ban don ïa ka mynsiem sngewlem da kaba noh synniang lem sha ka Chief Minister’s Relief Fund (CMRF) bad kyntu ruh ïa ki MLA ka Jylla ban ïa don bynta lang ha kane ka jingnoh synniang.
U la ong ba kam dei eh na ka bynta ka jingïarap sha ki lanot kiba la shah ktah na ka jingshlei um ha kane ka kynti hynrei kan dei ka jingpynkhreh na ka bynta ki lanot shah lynshop ha ki bor mariang kiba lah ban jia ha ki por ki ban sa wan,” ong u Myntri ka tnat Kam Pohing.
U la ïathuh ruh ba dang khyndiat sngi u Myntri Rangbah ka Jylla, u Conrad K Sangma ula her sha Delhi ban pan jingïarap pisa na ka Sorkar Pdeng na ka bynta ki lanot shlei um.
Haba kylli, hato ka Sorkar Jylla kan pynbna neem ïa ka jingshlei um ha rilum kum ka jingshah lynshop kaba wan na ki bor mariang, u Myntri u la ong, “ïa kane ka bynta ngin dang hap ban ïakren shwa ban shim ïa kane ka rai bad haduh mynta hi ka um ha rilum Garo kam pat hiar satia bad ki paidbah ki dang don hapdeng ka jingsyier.”
U James PK Sangma u la ong ba ki synshar distrik haduh mynta ki dang ïaleh katba lah ban ïarap ïa ki lanot kiba ngat ha kane ka jingshlei um da ki lad jingïarap bad ki la pynthikna ruh ba ki lad jingïarap kin poi sha ki lanot.
Shuh shuh u la ïathuh ba ka tnat ka Koit ka Khiah ka la trei miet la bad sngi khlem shongthait ban pynthikna ba kino kino ki jingpang kin ym mih na kane ka jingshlei um.
“Ka Sorkar ka la shimkhia bha ïa kane bad ngi pyrshang ban ïarap katba lah ban pynthikna ba ki lad ai jingïarap kin poi sha ki briew kiba la shah ktah ha kane ka jingshlei um,” la bynrap u James.
Ha kaba ïadei bad ka jingshlei um ha Nongbah Shillong, u la ong, ‘baroh hi ka dei na ka daw ba kim biang ki lad jingïada bad ba ki briew hi kim pyrkhat ba kan jia ka jingshlei um. Ïa mynta ngim pat lah ruh ban kren eiei halor kane hynrei ka Sorkar kan sa wad bniah halor ki jingkynthoh.”