Press "Enter" to skip to content

Noh synñiang ka TULBA-EKHD da ki shylliah sha ka Ganesh Das hospital

Shillong, Naitung :Ka seng ki nongñiah kali ar shaka, ka TULBA, East Khasi Hills District, hapoh ka jingïalam jong u President ka EKHD Unit u bah Rishan Nongrum, U secretary Evershiningstar Dkhar, u Daniel kharshandi Organising secretary ryngkat ki dkhot baroh ki la leit ban ai ki jingai sngewbha shapoh Ganesh Das Govt Hospital da ki spah tylli ki shylliah.
Ha katei ka sngi la ïoh ruh ka jingkren na u Bah Bamut Dopri, u Dr W. M kharlukhi, na u Adviser jong ka EKH u Banbhalang Mawiong, bad na u President Central body u Bah Seiborlang L Nonglait.
Shwa ban sam ïa kitei ki jingai la ïoh ka jing kren bah Seiborlang L. Nonglait uba la pynpaw ka jingsngew pangnud ban ïohi ïa ki nongpang khamtam ki khynnah khunlung ba ki hap ban thiah ha madan khlem ki jingsiang kiba biang. Kumta ula ong ba ka Seng da ka mynsiem ba dap da ka jingsngew synei bad ka mynsiem ba sngewkhia kala wanrah ïa kine ki jingsiang khnang ba kin lah ban pyndonkam haba kim pat ïoh ïa ki jaka thiah kiba biang.
Na ka liang ka Seng kala ong ruh ba ka kwah ban pynsngew ruh sha ka Sorkar ba kum ki hospital sorkar ki dei ban pynbiang shuh shuh ïa ki jaka sumar khnang ba lah ban ïarap ïa kiba bun balang, namar barabor la ju shem ba ki hospital sorkar kim ju biang ki tiar ki tar, bad bunsien haba wan shah sumar ha kine ki hospital la hap ban leh ïa ki test shabar, kata ha ki private hospital kiba ka dor ka long kaba rem bha namar ki hospital sorkar kim don ki tiar ba biang ban pyndep ïa ki test ba donkam. Kawei kaba ka Seng TULBA kala lap kalong ruh ba katei ka hospital kam da biang ha kaba ïadei bad ka um na ka bynta ki nongpang.
Kumta na ka liang ka Seng ka buh ka jingkyrpad ïa ka Sorkar bad sha u Myntri ka Koit ka Khiah ka jylla ba kin shim khia bad pynbha shuh shuh ïa kine ki hospital sorkar katkum kaba ïadei dur bad ka juk kaba mynta khnang ban lah ban ai ka jingshakri kaba biang tam khamtam na ka bynta u kup shiliang u sem shiliang..