Press "Enter" to skip to content

Shongkun ka jingrakhe ka Christian U.P School ïaka jingdap 25 snem ka jingïaid lynti

Wat hapdeng ki jingeh ban pyntyllun kum ka shlem hikai

Nongpoh, Naitung 19: Ka Skul Christian Upper Primary School, kaba don haka shnong Thad ha Ri-Bhoi wat hapdeng shibun ki rai eh rai dam bad ki jynjar ban pynïaid ïaka skul naduh bala seng ïaka ha u snem 1995 ban long kum ka shlem ai jinghikai bad jingstad sha ki khynnah ha katei ka thaiñ, hynrei da ka jingiphuh iphieng katei ka skul kala kynjoh shaka 25 snem ka jingïaid lynti bad ioh ban rakhe ïaka jubili rupa mynta u snem.
Kumba la pynpaw da ki bor pynïaid katei ka skul, ba kam long kaba suk ban pynïaid ïaka skul hynrei la seng ïa katei ka skul da ka shnong Thad bad ka kynhun Balang ha katei ka shnong ha u snem 1995 tang ka LP School, hynrei da ka jingïaishah, ka jing len lade naduh ki nongïalam shnong, ki nonghikai bad ki bor pyniaid katei ka skul, kala pynlong ïa katei ka skul ban nang roi katba nangmih ki sngi ban pynphriang ïaka jingstad sha ki khynnah bad long kum ka shlem ai jingstad ba pura, kumba ka long mynta bad la lah ruh ban kyntiew kyrdan haduh ka klas X.
Shuh katkum ka History katei ka skul, kila pynmih ruh shibun ki khynnah kiba la pass na katei ka skul bad poi sha ki jaka bapher bapher, bad kumba long haduh mynta ka dang dei ka skul kaba pynmih ka result ba bha haka eksamin SSLC man la u snem ha katei ka thaiñ.
La sakhi ruh ha katei ka sngi ka jingplie ïaka jingrakhe ïaka jubili rupa da u Bah Charles Marngar MDC ka Mawhati kum u kongsan, haka jingdonlang u Bah S Mawlong, RFO Social Foresty Umsning, Bah BR Rangtong Secretary ka Mananging Committee katei ka skul u ba long ruh u rangbah shnong, bad kiwei kiwei ki riew rangbah, ki longkmie longkpa katei ka shnong, ki nonghikai bad ki khynnah skul.
Haba kren ha katei ka sngi kum u kongsan, u Bah C Marngar u la pynpaw ka jingsngewkmen kaba khraw ba katei ka skul kala ioh ban rakhe kum katei ka sngi ba kyrpang hadien shibun ki jingeh bad ki jingjynjar jong ka jingïaid lynti naduh bala seng ïaka, bad nangkiew katba nangmih ki sngi kaba long ruh kum kawei naki shlem ai jingstad ha katei ka thaiñ.
U la ong ruh ban poi sha ka thong kam long kaba suk, namar barabor ki briew shwa ba kin kynjoh sha u mawmer ka jingjop, ki mad shibun ki jingeh bad ki jingtynjuh, hynrei dei tang kita ki bym kynran dien bad kiba ïaid shaphrang ki ban poi bad kynjoh shaka thong kumba ki angnud, kumba long katei ka skul wat hapdeng ki jingjynjar kala lah ban rakhe ïa kum katei ka sngi kaba kmen hapdeng ka jingiphuh iphieng.
Shuh shuh kum u la ong ruh ba watla u long tang u nongmihkhmat bar it ha katei ka thaiñ, hynrei u la ai ka jingkular ban ïatreilang halor ki jingdonkam jong ki naka bynta ban dang kyntiew ïa katei ka skul.
Ha kawei pat ka bynta naka liang u Bah Charles Marngar u la kyntu ruh ïaki khynnah skul ba kin nang trei shitom bad minot thop haki jingpule jong ki, khnang ba kin poi sha ka thong bad kumjuh ruh naduh ki nongïalam shnong, ki nonghikai bad ki bor pynïaid skul ba kin dang ïaid shaphrang naka bynta ban dang pyntyllun ïaka shalyntem ban pynphriang ïaka jingstad ha katei ka thaiñ, khnang ba katei ka skul kan dang kiew shaphrang.
La pynphuh pynphieng ruh ha katei ka sngi da ki jingrwai, ki mass drill naki khynnah skul bad la sam ruh ïaki khusnam sha ki khynnah kiba jop haka jingïakop dro, essay bad kiwei kiwei ki jingïakop bala pynlong ha katei ka sngi.