Press "Enter" to skip to content

U Duma u nongpynïap briew ba nyngkong

Da U A.Kharpran

Man la ka snem ka pyrthei shi tyllup ka ju rakhe ïa ka sngi “Keiñ noh U Duma U Dukhew” (World No Tobacco Day) ha ka 31 tarik jong u bnai Jymmang ban pynkynmaw bad ban mana ïa ki briew shaphang ki jingma kiba mih na kaba dih bad bam duma.Katkum ka jurip jong ka World Health Organisation (WHO), palat ar million shiteng ki briew ki ïap ei shi snem shi snem na ka daw ba ki kyrni ban dih bad bam duma. Hangne ha ri India jong ngi ruh,palat phew lak ngut ki briew ki duh noh ïa ka jingim shisnem shisnem na ka daw ba dih bad bam duma. U duma u dei u nongpynïap briew ba shyrkhei bad ba nyngkong ha kane ka pyrthei.
Ki jingma u Duma: U Duma u ktah ïa ka jingkoit jingkhiah ka met jong ngi, kam pher la ha kano kano ka rukom ngi pyndonkam ïa u, la ngi kjit ne tan ïa ka tdem lane ngi bam ne kjup ïa u. Kumba 95 na ka shispah ka pang bampong u tor (lung cancer), 75 na ka shispah ka pang tyrha tangkro, (Chronic bronshitis) bad ka pang at lynder (Em physema) bad 25 na ka shispah ki jingpang klongsnam (Ishamic heart diseases) la shem ba la ktah da ka jingdih duma. U briew uba la kyrni ka dih duma kumba 5 haduh 8 snem, uwei u sikret ne shi smuk ka duma ne uwei biri ne uwei u duma kyllaiñ u khate noh san minit shiteng na ka rta jingim u briew. Ka jingktah u duma ka kham jur shuh shuh lada u briew u dih ne bam ïa ka ryngkat bad ka kyiad, namar ka met u briew ka kjit kham kloi ïa ka bih duma ba la khleh lang bad ka kyiad. Ka jingim ka ap kumjuh ïa kito ki briew ki bym dih duma hynrei kiba bam bad kiba kjup ïa u ha ka shyntur jong ki. Kaba kham sngewsih ka long ba u duma u trei ruh ïa kito ki bym dih ne bam ïa u, hynrei kiba ring bad pynhiar mynsiem ïa ka tdem duma ba la pyrsad da kiwei pat kiba dih ïa ka.
Kumno u duma u ai bih ïa ka met jong ngi:- Ka Sali duma (Nicotine C10 H14 N 2 ka long ka bih kaba khlain haduh katta katta , ka shisien jaw ka sali duma (pure nicotine) ka lah ban pynïap ïa u ksew. U briew un ïap beit lada u dih ne bam 50 – 60 mg ka sali duma.La pyndonkam ïa ka um duma kum ka dawai pynïap khniang(insecticide & ‘Funigicide) bad teng teng ki briew ki pyndonkam ïa ka sali madih kum ka dawai niangdait. Haba ngi dih bad tan ïa ka tdem duma, 85% haduh 99% ka bih jong u duma ka rung shapoh ka met jong ngi. (Ka bih tdem duma ka kynthup ïa kine, carbon nonoxide, nitrites, anommonia, nitrasanider, hydrogen, Cyanide, sulphur, vinyl bad kiwei kiwei) Ki sikret bad la buh jingjiar (filter) kim lah satia ban khang khyrdep ïa kine ki bih ban ym rung hapoh ka met jong ngi, hynrei ki lah ban kham duna. Lada pyndonkam ïa ka tang lyngba ka um kada don ha ka ktang. Ka dih duma ka trei suki ïa ka met jong ngi bad ha kaba khatduh ki dkhot met jong ngi ki kylla bampong. U duma u long ka jingmynsaw ïa ka met jong u briew, namar u thang noh ïa ki doh stang (lining) jong ki dkhot met hapoh jong u briew ka ktah ïa ki tor, ka pyntlot ïa ka jingpang (Ulcer & Cancer). Shuh shuh u duma u thang noh ïa ki shibun bah ki shylluit jingmad (taste buds) jong u thylliej jong u briew. Kumta u briew uba dih kyrni ïa u duma u lah ban ïoh pang jyrhoh, ka suhkpoh, ka pang ryndang ne tangkro bad bun kiwei kiwei pat ki jait jingpang. Ka jingdih ne bam duma ka nangpynjur shuh shuh ïa ka jingpang sahiaw (Asthma).
U tor, ki tyndong lyer bad ki thliew lyer ha ka met ki jot ki sniew kloi daka jingdih kyrni ïa u duma. U Klongsnam bad ki thied ki jaw ki tlot bad ki kem pang kloi haba la kyrni palat ka dih duma. Don bun bah ki briew kiba ïap man ka sngi na ka daw ka jingpang kyndeh klongsnam. Ka jingkyrni dih bad bam duma ka ktah ïa ki bniat, dohbniat,ki shyntur bad ka snieh doh. Ka jingdih duma ka pyntlot ruh ïa ka bor ïaleh pyrshah jong ka met ïa ki khñiang jingpang. Ka jingkyrni dih duma ka lah ban ktah ruh ïa ka kha ka pun ki kynthei bad ka pyntlot ïa ki symbai jong ki shynrang.
Ka jingmyntoi aïu ngi ïoh na u duma:- La mana bad maham ïa ki jingmynsaw bad jingman jong u duma (tobacco) ha ki synduk sikret hi, ha ki kot khubor bad ki kot pule, ha ki magazine, ha ki tyndong dur (television), ha ki tyndong sawa (radio) bad ha kiwei kiwei pat ki lad pathai pynphriang khubor. Pynban bun na ngi ngim shym da salia eh tad haduh ban da wanlap ka pang ka khrew na u duma dukhew. Ka jingdih duma kam wanrah jingmyntoi ei ei ruh em, hynrei ka jinglut ksan suda. U duma u wanlam tang ka jinglut phut bad jinglutksan haba ngi thied ban pyndonkam ïa u. Shibun bah ka spah ka pynsyrwa ha kaba sumar ïa ki jingpang ba mih na u duma. Ha kine ki sngi mynta khamtam ha ki sor bad ki nongbah ki jaka ba bun ki karkhana ka lyer jong ka mei mariang ka la jaboh bha, ka tdem duma na ka met jong ngi. Ka tdem duma ka trei kham jur ïa kito kiba shong suk ha ki dukan, ha ki ïing ha ki kamra Ophis bad kiwei kiwei namar ba ki long ïapop. Ka duma kam wanrah jingmyntoi ei ei ruh em, lait noh jinglutphut, ki jingpang laiphew jait , ka jingpyntlot ïa ka met bad ka jingpynsted ïa ka syrngiew ka jingïap ba kan wan rong noh ïa ngi.Ka jingdih duma jong ngi ka pynsngewsih ïa kiwei pat ki para briew ki bym dih bad ka kit ruh ïa ka jingpang jingshitom sha ki. Ka Sorkar ka hap ban pynlut shibun ka spah ka phew ban bsa, ban thied dawai bad ban sumar ïa ka jingpang ba la ktah da ka duma. Kiba ïoh jingmyntoi na u duma dei tang kito kiba trei karkhana shna sikret ,biri bad ki khaini ba la lum da ka Sorkar na u duma ka la pynlut noh hi ha kaba thied dawai bad sumar ïa ki nongpang.
Aïu ngi dei ban leh:- Kumba la kdew sha khmat ka jingma ka ap ruh ïa kito ki bym dih duma,hynrei ba la pyndih duma jubor da ka jingpyrsad tdem duma jong kito kiba dih. Katkum ka jingshem jong ka W.H.O (World Health Organisation) ka jingtrei u duma ka jur bha ha kito ki bym ju dih duma (Non-Smoking Smokers) katkum ka rai jong ka jingïalang bah (World Health Assembly) ha Geneva ha u bnai Jymmang 1985, kito ki bym dih duma ki don ka hok ban ïada ïa ka jingkoit jingkhiah jong ki na ka jingpyntngit tdem duma ïa ka mariang (lyer) sawdong jong ki. Hangne ha ri jong ngi bun ki briew kim salia satia hynrei ki dih duma sahuh katba mon ha ki jaka paidbah kum ha ki bus, ki taksi, ha ki kamra pyni dur (Cinema & Video Hall ). bad kiwei kiwei pat ki jaka ba khapngiah briew. Don bun ki briew kiba ju mlien ban dih duma ha ki kamra rit ne kamra thiah ba don ki khyllung. Kane ka jingdih pathar khlem pyrkhat ka ktah jur ïa ka koit ka khiah jong ki briew ki bym dih khamtam ïa ki khyllung bad ki khynnah rit bapli. Ha ki kali ki briew sha nongkyndong lei lei nalor ba ki khapngiah ka mih sa ka tdem duma dih na ka shlim tdem biri, tdem duma kyllaiñ,tdem sikret bad teng teng khleh lang da ka tdem kynja ruh haduh ba ka pynlong baïong ïa ka khlieh.Kane ka ktah jur bha ïa ka koit ka khiah jong ki paid nongshong kali ki bym dih duma.
Ka Sorkar namarkata lada ka dei kaba don jingkit khlieh ïa ka koit ka khiah jong ki paidbah, kaba kit khia shisha ban rat dyngkhong ïa ki jingpang bad ban pynïoh ïa ka jingkoit jingkhiah ïa baroh shwa ka ar hajar snem ka dei ban pyrkhing ïa ki jingmana bad jingmaham ba ym bit shuh ban dih duma ha ki jaka paidbah. Ka long kaba kai bad kam don jingmyntoi satia ban shu thoh kai ïa ki jingmaham bad jingmana.” No Smoking’ ne ‘Wat Dih Duma’ lada shah ba kin dih katba mon bad ka long pynban ka jinglehrain ïa ki briew kiba wan na bar. Ki paidbah baroh, ki Sengbhalang etc,. Ki la dei ban husiar bha lada ki kwah ban long ki briew kiba koit ba khiah krat, kiba im suk im sai, im tymmen shongshang shongprah bad kiba riewspah namar ka jingkoit jingkhiah ka dei ka spah bah.
Lada ngi kwah ban long kiba koit ba khiah kiba lait na ka pang ka khrew to ngin kiar ban kyndiah noh na u duma dukhew. Pynduna bad sangeh noh syndon na ka tan duma , sangeh noh ka kbum duma, sangeh noh ka bam khoini, ka bam golden,ka bam jirda namar ki wanlam ïa ki jingpang lai phew jait, ki pynlyngkot ïa ka rta bad ki wallam ïa ka jingïap kloi. La shem ba ki jingpang ki koit bad jah kham kloi bad ka met jong ngi ka ïoh bor pat lada ngi lah ban sah bad iehnoh syndon ïa u duma. Im suk im sain im slem shirta to kiar kyndiah na u Duma. (Mawphor 11 Nailar 2000)