Press "Enter" to skip to content

Ujor FIR ka HSU, AJHSWO ïa u khar die syiar ha 4mile West Jaiñtia

Shillong, Naitung:Ki artylli ki seng bhalang kiba kynthup ïa ka Seng Hynñiewtrep Students Union (HSU ), bad ka All Jaiñtia Hills Social Welfare Organization (AJHSWO), ki pynpaw ka jingsngewkhia kaba jur hadien baki la ïoh jingtip kaba thikna halor ka jingdon jong uwei u bar jylla ïa uba tip kyrteng kum u Abdul Hamit na ka shnong Barpeta, Assam uba shong die syiar ha 4mile lad bypass Mihmyntdu, West Jaiñtia Hills, khlem da don ki kot ki sla kiba biang khamtam ka trading license namar katei ka kam kadei kaba ma u hi ula long trai.
Hadien ba kine ki ar seng kila pynlong ka jingleit jurip kila lap ïa ka jingshisha ba utei u briew um don satia ïa ka trading license bad kiwei kiwei ki kot ki sla kiba biang.Kumta kine ki ar seng kila leit ban ujor syndon da ka FIR pyrshah ia utei u bar jylla hapoh Jowai Police Station.
Hynrei, kine ki seng kila pynpaw ia ka jingsngew kyndit namar hadien ba kila dep ban ujor sha ki pulit la don kawei ka longkmie Khasi (Pnar) kaba dei ka trai ïing jong kata ka ïing ba shim wai utei u bar jylla kaba la wan ban kam trai ïa kata katei ka kam die syiar jong utei u bar jylla. “Na ka liang kitei ki ar seng ki pynrem jur ïa katei ka longkmie kaba wan ban ïada ïa une u briew khlem da pyrkhat ïa ka lawei jong ka jaidbynriew ba shitroh jong ngi. Lada don bun kum kine ki kynthei kiba ïada ia ki briew kiba nabar sa tang katno ka jaidbynriew ritpaid jong ngi kan sa jah rngai noh bad ruh kan sa long kum ha ka jylla Tripura ha kaba ki trai ri trai muluk kila shah ïuhroit ha ki briew kiba na shabar,” ong u president ka HSU u samla K.Rymbai.
Shuh shuh na ka liang kine ki ar seng ki dawa na ki bor jong ka aiñ ba kin sngewbha ban shimkhia bad ban leh katkum ki kyndon aiñ pyrshah ïa utei u bar jylla, bad ruh na ka liang ki arseng kin sa leit ban ïakynduh ïa u EM in-charge license JHDC ban ujor pyrshah ïa kane ka briew ba leh benami ïa une u briew.
Shuh shuh kine ki ar seng ki pynpaw ba ka jingkharoi ki bar jylla kadei ka jingleh sting ka JHADC bad ruh ki dawa na ka Council ba kan sngewbha ban sdang noh ïa ka jingkhynra license ha baroh kawei ka district. Ha kajuh ka por kine ki seng kila ong ba kin ym shong kli kti hynrei kin dang ïai bteng ban ïada ïala ka jong ka jaidbynriew, pynkut u kyrwoh lyngba u samla K.Rymbai president HSU bad R. Biam president AJHSWO.