Press "Enter" to skip to content

Da ki pump um sam u MLA sha ki nongrep ka Mawhati ban kyntiew ïaka rep ka riang

Nongpoh, Naitung 27: ki nongrep ka thaiñ Mawhati mynta ka sngi kila pynpaw ka jingsngewkmen kaba khraw hadien ba u MLA ka Mawhati u Bah Dasakhiatbha Lamare u la pymioh bad sam ïaki pump um naka bynta ba kin ioh ban tan um sha ki lyngkha ki risai jong ki bad kumjuh ban kyntiew ïaka rep ka riang ha katei ka thaiñ.
Ha katei ka jingsam bad aiti ïaki pump um, kumba 10 tylli ki longing kila ioh jingmyntoi kaba dei ruh ka skhim ba u MLA u la pynioh lyngba ka tnad agriculture.
Ha katei ka sngi ka jingsam bad aiti ïa kitei ki pump um la sakhi ruh da ka jingdon lang u Bah Raton M Mukhim, Bah Donbok Kharnaior bad kiwei kiwei ki riew rangbah ryngkat ki nongrep kiba la poi bad ioh jingmyntoi ha katei ka sngi lyngba kitei ki pump um.
Haba kren ha katei ka sngi haka jingïalang ban sam ïa kitei ki pump um u Bah Dasakhiatbha Lamare kum u nongmihkhmat u la pynpaw ka jingsngewkmen hadien ba ki nongrep kila ioh jingmyntoi lyngba kitei ki pump um ba kila ioh ban tan um sha ki lyngkha ki risai jong ki bad ban nang kyntiew ïa rep ka riang ha katei ka thaiñ bad ai ruh ka jingïaroh ïaka sorkar MDA kaba la shimkhia ban pynioh ïa katei ka skhim naka bynta ki paidbah nongrep.
U la ong ruh ba kane ka dei tang ka jingsam ba nyngkong ha kaba shibun ki nongrep kin dang ioh jingmyntoi bad u la kular ruh ban wanrah shuh shuh shibun ki skhim pynroi naka bynta ban kyntiew ïaki nongrep ha katei ka thaiñ bad ruh ban pynioh shuh shuh ïaki tiar rep bad ki jingdonkam jong ki nongrep naduh ki kor lur, ki pump bad kiwei kiwei.
Shuh shuh kum u nongmihkhmat ka thaiñ u don ruh ka jingangnud ban kyntiew ïaki nongrep bad ka rep ka riang ki paidbah katei ka thaiñ bad kyntu ruh ïaki paidbah ba kin ai ka jingïatreilang nakapor shaka por naka bynta kiwei kiwei ki skhim pynroi ba ki paidbah ki dei ban ioh jingmyntoi naka sorkar.
U la kyntu ruh ïaki nongrep ha katei ka sngi ba ki dei ban sumar bad pyndonkam hok ïakitei ki tiar kiba ka sorkar kala mang kyrpang naka bynta ki nongrep naka bynta ban kyntiew ïaka rep ka riang haka thaiñ bad shibun kiwei kiwei ki skhim ban ïarap ïaki nongrep kin dang wan ha kaba u la kular ruh ban shimkhia ban peit kyrpang ïaki nongrep ha katei ka thaiñ, u la bynrap.