Press "Enter" to skip to content

Ka jingkhang ka plie lada ki MLA ka Congress ki wan sha ka BJP : Nalin Kohli

Shillong, Nailur, 27: Ki khubor kiba pur ha kine ki khyndiat sngi ba ki MLA ka Congress ki la pynpaw ba ki don jingmut ban leit pynïasoh noh ïalade sha ka Bharatiya Janata Party (BJP), na ka liang u Nongaiktien ka BJP u Nalin Kohli mynta ka sngi saitjaiñ ula ong ba ka jingkhang ka plie arphew saw kynta lada ki kwah ban trei na ka bynta ka bha ka miat bad ka roi ka par jong ki paidbah.
Haba ïakren bad ki nongthoh khubor hadien ka jingïalang ba shisien lai bnai jong ka BP kaba la long ha nongbah Shillong, u Kohli u la ong, “ka jingkhang jong ka BJP ka plie ïano ïano kiba kwah ban wan pynïasoh da ka jingthmu kaba bha bad ban trei na ka bynta ka roi ka par kumba ka Sorkar u Narendra Modi ka la buh thong.”
Haba pynpaw ïa ka jingngiah shoiñ ïa ki Nongïalam ka Congress ha ka ri baroh kawei, une u Nongaiktien ka Congress u la ong ba bun kiba la wan pynpaw ba ki kwah ban ïasnoh ïa lade
bad ka BJP. U la ong ruh ba ki Jylla kiba heh ha ka ri India ki la jied ïa ka BJP ban thaw Sorkar bad mynta sa tang ka Jylla Meghalaya ba ka BJP ka donkam ban pynbun shuh shuh ïa ki MLA.
U la ïathuh ba ka BJP kan sa pynkhlaiñ bha ïalade ha ki snem ki ban dang wan da kaba ïasyllok lang bad u National President bad kumjuh ruh ha baroh ki State Unit.
“Ha ki bnai ban sa wan, yn sa pynthymmai lut ïa ka rukom treikam jong ka party,” ïathuh u Kohli.
Ha kawei pat ka liang, u General Secretary ka BJP Meghalaya Unit, u Bah Bashai Khongwir u la ïathuh ba kane ka jingïalang ba la long mynta ka sngi ha nongbah Shillong ka la ïakren bad ïathir bun ki ishu ba kynthup ïa ka jingpynkhlaiñ ïa ka jingtreikam ha ka jylla baroh kawei.
U la ïathuh ruh ba ki nongïalam ha New Delhi ki la pdiang ïa ki hynriew haduh hynñiew ngut ki kyrteng na ka bynta bana ïakhun ïa ka post President ha kaba yn sa pynbna paidbah ha ki bnai ban sa wan.