Press "Enter" to skip to content

Khang ka Sorkar Assam bad Jylla West Bengal ban pynpoi masi sha Meghalaya

Shillong, Naitung 27: Ka Sorkar Assam bad Sorkar West Bengal kala pynsangeh ïa ka jingshalan masi sha Meghalaya namar ka daw ka jingïoh jingtip ba ka jingkhaii masi tuh sha Bangladesh ka jur bha na kane ka Jylla.
Ki Nongotdoh ha Jylla kila shem jingjynjar mynta ban ïoh ïa ki masi ba wan poi ha Jylla Meghalaya na kiwei pat ki Jylla kum ka West Bengal, Bihar, Uttar Pradesh khamtam na Upper Assam.
“\Ngi ïoh jingtip ba ka Sorkar Assam bad West Bengal kila khang ïa ka jingshalan masai sha Meghalaya halor ka nongrim ba ïa ki masi la khaii tuh sha Bangladesh” ong u Bah Generous Warlarpih President ka Khasi Jainta Butcher Welfare Association (KJBWA).
Kat kum ka jingong jong u “Ngi la pyrshang ban nym pynkiew ïa ka dor jong ka doh masi hynrei hadien ka jingïakhih jong ka seng KJBWA ba jur ka jingkhaii tuh ïa ki masi sha Bangladesh khamtam na Iew Khanapara,ka jingpynpoi masi kala duna bha sha ka Jylla”.
Haba pynpaw tang 30% na ki dukan die doh kila plie hadien ka jingïakhih, ula ong “ Ki nongotdoh kim don lad da kumwei pat hynrei ban thied ïa ki masi napoh ka Jylla ha ka dor kaba rem kaba ka dor ka ïapher haduh T. 10000 kawei ka dor haba ïa nujor bad ki masi ba wanrah na shabar ka Jylla”.
U Bah Generous u pyntip ba ki nongdie doh mynta ki die ha ka dor ba T. 300 ïa ka doh ba ïakhleh lang bad ka shyieng bad T. 360 ïa kabym don shyieng ban lah pynim namar ki nongri masi na Jylla kila shim kabu shaba palat bad die ïa ki masi ha ka dor kaba rem bha.
Une u Nongïalam ka KJBWA u pyntip ba ha ka jingïalang ba long hynnin ka sngi,, baroh ki nongotdoh kila pynpaw ïa ka jing jynjar ba kim lah satia ban pynim ïa ka jingkamai ha ka dor kaba ïaid mynta bad kim don lad da kumwei pat ban pynkiew dor ïa ka doh masi.
“Ngi la ïakren ruh ha ka jingïalang hynnin ka sngi ban dawa ïa ka Consumer System Forum kumba long ha kiwei pat ki Jylla kum ka UP bad kiwei kiwei ha kaba ïa ka dor yn khein da ka kilo bad kane kan tehlakam shi katdei eh ïa ka jingkhaii tuh ïa ki ksi” ula ong.
Ha kajuh ka por, ki Nongotdoh kila pynpaw ïa ka jingbynniaw ba ka Sorkar Jylla kam shym bat ïala ka jong ka kular bad ong “U Symbud Myntri Rangbah ka Jylla Bah Prestone Tynsong ula ai ka jingkular ban kyrshan ïa ka Iew die masi ba shipor ha Byrnihat hynrei mynta ula kylla ktien da kaba ong ba kaei kaba ngi kwah ka long ba ngin ïoh ïa ka jingbit na ka District Council namar ki Doktor ka Veterinary kim lah ban leit peit ïa kakoit ka khiah jong ki masi ha Iew Khanapara bad ha Byrnihat ha kajuh ka por”.
“Ha ka jingïakynduh biang jong ngi ïa u Bah Prestone ha ka 23 tarik Naitung, u Bah Prestone ula pyntip ba ïa baroh ki jingdon kam bad ki jingpynbeit baroh la dei ban leh beit ha Iew Khanapara bad ym lah satia ban buh ïa ka iew ba shipor ha Byrnihat, kaba long kum ka jingkylla ktien ïa kaei kaba la kular ha ngi. Ngi suba jur ba ka don kaei re kaei ha lyndet jong kane” ula ong.
Une u Nongïalam ka KJBWA ula kyrpad ïa ki paidbah ba kin ïai shah haba ïadei bad ka jingeh jong ki nongotdoh bad ba kin iarap ban ai jingmut lem ha kaban lah ban tehlakam ïa ka jingkhaii tuh ïa ki masi sha Bangladesh.