Press "Enter" to skip to content

La pynlong ïa ka jinghikai pynjanai ïa ki Nongbishar ka jylla

Shillong, Naitung 27 : U Nongbishar jongka ïing bishar High Court jongka jylla uba long ruh u Judge In-Charge jong ka Meghalaya State Judicial Academy (MSJA) u bah H.S Thangkhiew u la plie ïa ka jinghikai pynjanai shuh shuh ïa ki Nongbishar ki ïing bishar ka jylla kaba shisngi kaba la tip kum ka Mediation Training Manual for Referral Judges kaba la pynlong da ka MSJA hi ha Conference Hall jongka ïing bishar High Court ka jylla.
Haba kren ha ka jingïalang plie u Justice Thangkhiew u la ong, kane ka jingpynjanai shuh shuh ïa ka rukom bishar ka long kaba donkam bha haduh katta katta. U la kdew khamtam eh ha kane ka thaiñ kaba la don lypa ka synshar paidbah naduh tynrai ka long kaba donkam ïa ki Nongbishar ba kin tip bniah ïa ki aiñ bha
khnang ba kin long ki nongbishar kiba jop bad ai ïa ka jingbishar kaba biang tam.
Kiba ai jinghikai ha kane ka sngi ki long Dharmender Rana, Additional Registrat Supreme Court , Member Secretary, Mediation and Conciliation Project Committee bad u Kishore M Jaiswal District Judge and Judge City & Session Court Greater Mumbai.
ïa ka jingkren ai khublei la ai da i Director ka MSJA i Kong M.B Challam bad kajuh ka por i la pynshai ruh halor ka jingpynlong ïa kane ka prokram na ka bynta ki Referral Judge ne ki Nongbishar hapoh ka jylla.