Press "Enter" to skip to content

Na ka Piggery Mission ba 220 klur yn ïoh jingmyntoi ki nongri sniang ki paidbah ka Jylla Meghalaya

Shillong, Naitung, 27: “Ki nongri sniang kin sa ïoh jingmyntoi shikatdei eh na ka Meghalaya Piggery Mission ka projek kaba T.220 klur ynda la pyntreikam noh hapoh shi bnai ha ka Jylla Meghalay,”ong u Myntri Khynnah ka Sorkar Pdeng u Dr. Sanjeev Kumar Baliyan uba peit ïa ka tnat Animal Husbandry, Dairying & Fisheries.
U Myntri Khynnah u la pynpaw ïa kane ha ka jingïalang kaba la long ha nongbah Shillong mynta ka sngi saitjaiñ bad ki nongri jingri kiba wan na ki shnong bapher bapher ka Jylla ban pynsngew ïa ki jingeh ba ki ïakynduh ha kaba ïadei bad ka kam ri jingri.
“Kane ka dei ka projek kaba kham pher ba la pynsngew da ka Sorkar Meghalaya sha ka National Cooperative Development Corporation (NCDC) bad sha ka Sorkar Pdeng na ka bynta ban kyntiew ïa ka kam ri sniang ha ka jylla kaba long kumba T. 220 klur. Lyngba kane ka projek Piggery Mission yn sa shna shuh shuh sa kumba 300 tylli ki pharm ha kylleng ka Jylla ban sa pynïaid da ki Cooperative Society,” la pynshai u Myntri Khynnah.
“Ka Ministry mynta ka kloi ban bei pisa na ka bynta ban ïarap ïa ki briew ka Jylla Meghalaya lyngba ka kam ri sniang,” ong u Myntri Khynnah.
U la ong ruh ba kiwei kiwei ki jylla ki lah ban bud nuksa na ka Jylla Meghalaya ha kaba ïadei bad kane ka projek bad kyntu ruh ba donkam ban pynshlur ïa ki riewshimet ba kin shim ïa kane ka kam, ym tang ïa ki Cooperative Society khnang ba kan plie lad ïa ka ïohkam ïohjam.
Na ka liang u Myntri u la ïaroh ïa ka Sorkar Meghalaya ha kaba ïadei bad ka jingkyntiew ïa ka kam ai dud bad ïathuh ba ka Meghalaya ka dei ka jylla kaba ai pisa bun tam ïa kiba trei ïa kane ka kam kaba long T 42 shi litre.
U Myntri Khynnah u la kular sha ki nongri jingri ba un sa ïakren bad ki bor pynïaid ka Indian Council of Agricultural Research (ICAR) North East Region lashai ka sngi u Blei ban pynïoh ïa ki jingbam kiba duna dor ïa ki mrad khnang ba kan ym ktah ïa ka kam ri jingri.
U Myntri u la ong ba ka Ministry of Animal Husbandry, Dairying & Fisheries kaba u peit kan sa pyrshang beit ban pynbha ïa ka jingshakri jong ki doktor.
Hadien ba u Myntri u la sngew la sngap da lade ïa ka jingud jong ki nongri jingri bad ïa ki jingeh ba la pynpaw da ki Dotor ka tnat Veterinary, u Dr. Baliyan u la ong, “ka jingduna ki Doktor Veterinary ka long ha ka Ri India baroh kawei bad kane ka jingeh kam dei satia tang ha kane ka Jylla Meghalaya.”
U la kyntu ïa ka Sorkar Jylla ba kan phah ïa ki briew ban ïoh jinghikai lai bnai ha kaba ka Sorkar Pdeng kan bei lut ïa ka jinglut jingsep na ka bynta ban phah shah pyntbit ha ka National Dairy Research Institute (NDRI), Karnal bad ha ka Central Avian Research Institute, Bareilly.
Ha kaba ïadei bad ka jingduna ki Dispensary bad ki Laboratory ha Meghalaya jong ka tnat Animal Husbandry & Veterinary (AH&Vety) ban ai jingsumar ïa ki mrad u Dr. Baliyan u la kyntu ïa ka Sorkar Jylla ba kan phah ïa ka jingtyrwa sha ka Sorkar Pdeng ha kaba un sa thaw lad ban mang pisa na ka bynta kane.
Na ka liang ki nongri masi ki la kyrpad ïa u Myntri ba un shimkhia lem ban pynthikna ban pynïoh ïa ki Injekshon kiba pynthikna ba ki Masi khemdud kin kha da ki masi kynthei. “Ka Sorkar haduh mynta ka dang pyrkhat sani bha bad shen ngan sa shimkhia halor kane ka jingdawa,” la ong shuh u Dr. Baliyan.
U la ong ruh ba ka tnat kan pyrshang beit ban pynbha ïa ka jingshakri ha kaba ïa kane la pynpaw ha ka jingïalang Kynhun Myntri kaba nyngkong jong kane ka Sorkar Pdeng ha kaba la mynjur ban pynlait T 13,500 klur na ka bynta FMD bad ka Brucellosis.
Shuh shuh u la ong ba ka Ministry of Animal Husbandry, Dairying & Fisheries kan sa pynurlong ïa ka jingangnud jong u Myntri Rangbahduh ka ri u Narendra Modi ban kyntiew arshah ïa ka kamai kajih jong ki nongrep bad ki nongri jingri shuwa jong u snem 2022.
Ha ka por mynstep une u Myntri Khynnah ka Sorkar Pdeng ula leit jngoh da lade ïa ka Pig and Poultry Farm bad ïa ka Intensive Cattle Development Programme (ICDP) kiba don ha Upper Shillong ha kaba u la ïohlad ban ïasyllok bad ki doktor, ki nongrep bad ki ophisar.
Ha ka jingleit jngoh ïa ka ICDP Central Semen Bank, Upper Shillong u Myntri u la ong ba ka Artificial Insemination ka long 5.26 % ha kaba ïadei bad ki masi ba ri ki briew da kaba bynrap ba kane ka long kaba duna bha ynda nujor bad ka National Average kaba long 30 %.
Ha ka por janmiet, u Myntri u la leit jngoh pat sa ïa ka Meghalaya Milk Processing Centre kaba don ha Mawiong.