Press "Enter" to skip to content

Na Ri Bhoi sdang ka SBI General Insurance ban pynsngewthuh paidbah halor ka jingdonkam ka Insurance

Nongpoh, Naitung 27: Ka SBI General Insurance kum kawei na ka Company Insurance kaba heh tam ha ka ri india mynta ka sngi ka la sdang shuwa ba ai jinghikai sha ki paidbah halor ka jingdonkam ki paidbah ïa ka Insurance ba la pynlong ha District Library Auditorium Hall, Nongpoh ha Ri Bhoi District.
Ïa kane ka prokram ai jinghikai halor ka jingkongsan ka Insurance la plie paidbah da u Sujay Banerjee, IRDAI Member (Distribution) ka SBI General Insurance ha ryngkat ka jingdn lang ka Deputy Commissioner ka Ri Bhoi, ka Kong R.M Kurbah, ki ophisar sorkar na Ri Bhoi bad ryngkat ki paidbah nongshong shnong ka Ri Bhoi.
Haba kren ha kane ka sngi, u Pushan Mahapatra, MD & CEO, SBI General Insurance u la ong ba ka Insurance ka dei kawei na ka phang kaba kham shemjynjar ban pynsngewthuh ïa kiba bun ki paidbah kiba ym pat tip kaei ka jingmyntoi ba ki ioh na ka Insurance bad kane ka prokram ai jinghikai la plie paidbah ka long shi bynta ban pynsngewthuh sha ki paidbah ba ki dei ban sngewthuh kaei ka jingkordor ban don ka Insurance.
U la pynshai ruh halor ka hok bad ka jingkitkhlieh ba dei ban don ka Policy ha ka Insurance kaba iarap ïa ki paidbah lada ki kynduh ha kano kano ka jingeh, namar kumba long haduh mynta ka Meghalaya ka dang poi tang 0.70% kiba la don ïa ka Insurance.
Kumba long haduh mynta kiba la pyndonkam ïa ka Insurance ki kynthup Motor insurance ba la poi kumba (53%), Fire (24%), GPA (11%) bad na ka bynta ka koit ka khiah dang poi tang kumba (8%). Ka SBI General Insurance la pyntreikam ïa ka dei halor ka thong ban ïarap bad ban pynsngewthuh paidbah ba ka Insurance la ka long na ka bynta ka jingim briew ne ki mar ki mata, ki jingthung jingtep ba kin ioh ka jingiarap haba ki kynduh ïa kano kano ka jingjia ba sngewsih.
Shuh shuh , u la ong ruh ba lyngba kane ka General Insurance ka SBI kin leit ban pynsgnewthuh paidbah sha baroh ki shnong ki thaw ba ki paidbah ki dei ban sngewthuh ïa ka jingkordor ka Insurance, namar bunsien na ka jingbym don ka Insurance ki paidbah haba ki kynduh ïa ka jingba sngewsih ki kynduh mawsiang tang namar ba kim don ïa ka Insurance kaba ban iarap ïa ki ha kum katei ka por la ka long ka jingduh ka jingim, ne ka jingduh ki mar ki mata ne ka jingduh ki jingthung ki jingtep haba don kano kano ka nemsniew.
Na ka liang ka Deputy Commissioner ka Ri Bhoi, ka Kong R.M Kurbah haba kren ha kane ka sngi ka la pynpaw ka jingkmen ban don kum kane ka prokram bad khamtam ka Ri Bhoi kum kata ka Aspirational District ruh ka phaikhmat bha sha ki paidbah ba kin dei ban tip ha ka liang ka kynshew kyndiap (Financial inclusion) khnang ba kin suk hadien habun.
Kum ka heh duh jong ka District, ka Kong R.M Kurbah ka la kular ruh ban ai ka jingiatrei lang bad ka SBI General Insurance bad khamtam ban pynsngewthuh sha ki shnong nongkyndon ba ki tip kumno ban kynshew kyndiap khamtam kum ka Insurance ruh kaban iarap ïa ki bang dang kiew ha baroh ki liang jong ka jingim briew.
Kiwei kiwei kiba la don lang ha kane ka sngi ki kynthup Pushan Mahapatra, MD & CEO, SBI General Insurance, u Prakash Chandra Kandpal – Deputy CEO SBI General Insurance, Ramadevi – GM Comms IRDAI, ki ophisar sorkar bad kynthup ruh ki officer na ka LIC bad GIC bad kiwei kiwei de.