Press "Enter" to skip to content

Dei namar ka ‘vote bank’ ba kwah pynrung ST ïa ki Lalung : Latiplang MDC

‘Kiwei ki jylla NE kim ailad satia ïa kiba nabar’
Shillong, Nailar 12 : U MDC ka Nongthymmai, Bah Latiplang Kharkongor u la pynpaw ïa ka jingpyrshah kaba jur halor ka jingdawa jong u MLA ka Mawhati ba dei ban pynrung lang ïa ki Jaidbynriew Lalung ha ka thup jong ki Jaidbynriew Riewlum ka Jylla ne Scheduled Tribe.
Haba kren bad ki lad pathai khubor ha ka sngi Nyngkong, utei u MDC u la ïathuh ba wat na ka liang ka Synjuk ki Rangbah Shnong ka Nongthymmai Pyllun dang shen ki la leit ban kynduh ïa u Myntri Rangbah ka jylla, Conrad K Sangma ban dawa na ka sorkar ba kadei ban weng lut noh ïa ka thup jong ki jaidbynriew riewlum kiba dei na kiwei pat ki jylla ka thaiñ shatei lam-mihngi jong ka ri khnang ba kin ym lah shuh ban knieh lang ïa ka hok jong ki jaidbynriew riewlum kiba dei na Meghalaya.
“Tang kiba la don lypa ruh ki la bun, kumno keiñ yn pynrung shuh namar tang kiba la don lypa ruh ki la kot palat 50 tylli ki jaidbynriew na ki jylla bapher bapher,” u la bynrap biang.
Shuh shuh u la kynnoh ruh ba katei ka sienjam ba la shim da utei u MLA kadei beit tang ha kyrteng ka ‘vote bank’ da kaba pynkynmaw ruh ba wat ha ka sngi ba ki kynduh ïa u Myntri Rangbah ka jylla ruh u la pynmih ïa ka kyntien ba kitei ki jaidbynriewLalung kiba sah ha khappud bad ka Assam ki la don haduh 8,000 ngut. “Lada ki nongmihkhmat paidbah ki mih ban dawa na ka bynta ka ‘vote bank’ kaei kein kaban jia ïa ka Jaidbynriew ha ki por ban dang wan.”
Shuh shuh u ong ruh ba wat ha Assam ki Khasi kim ïoh satia ïa ka jingithuh, kumta kam long satïa kaba ïahap ba da u MLA un ïakhun ban pynrung ïa ki ha ka thup ki ST Meghalaya.
Utei u MDC u ong ruh ba ka jingbun ki jaidbynriew ba ïoh kyrdan Scheduled Tribe ha ka jylla ka la pynlong ïa ki samla trai ri trai muluk ban shah knieh lut wat ha ka hok ïohkam ïohjam ruh. Katkum ka jingong jong u, na ki 200 tylli ki kam kiba lait ha NEIGRIHMS, 17 tylli la mang ïa ki ST jong ka Meghalaya, kaba mut ba baroh ki 50 tylli ki jaidbynriew kiba don ha katei ka thup ST jong ka Jylla ki lah ban ïa knieh lang ïa katei ka bhah.
“Lada ka long kumne, katno eh ki samla jongngi (Khasi, Jaiñtia bad Garo), ngin ïoh namar ngi don da ki spah ngut ki samla kiba pyndep ïa ka Nursing. Kane kan sa ktah jur bha ïa ki ha ka ïoh kam ïohjam,” bynrap biang utei u MDC.
Ha kawei pat ka liang, utei u nongmihkhmat u la ong ruh ba kiwei ki jylla kum ka Sikkim, Nagaland bad Mizoram ki pyrkhing bha wat ïa ki para riewlum ban ïoh rung ha ka thup ST jong ki. “Ha kiwei ki jylla, ki jaidbynriew jongngi kiba la sah la 70 ne 80 snem kim ïoh satia ïa ka jingithuh kum ki riewlum hynrei hangne pat ki briew kiba nabar ki ïoh lut ïa ki jingmyntoi baroh.”.
U Bah Latiplang u ong ruh ba um pyrshah ei ei ïa ka jingong jong u Syiem ba ki dei ki trai shnong, hynrei kaba kum u nongmihkhmat ha KHADC u sngew ba donkam ïa ka sorkar jylla ba kan phaidien biang halor ka Notification jong u snem 1950 kaba ïadei bad katei ka bynta.
U ong ruh ba ki hap ban pynkynmaw biang ïa ka sorkar jylla khnang ba yn dup lah ban pynkylla thymmai ïa ka Presidential Order (Scheduled Tribe) 1950 namarba ka Meghalaya wat hadien ba ka la ïoh la ka jong ka jylla mynta la 47 snem kam pat pynkylla shisien ruh ïa katei ka thup kyrteng ki riewlum kiba ka la kaba ka shu bud na ma Assam.