Press "Enter" to skip to content

ïa ka MLA skhim ym dei ban ïalehkai politik shisien san snem : Banteidor

Shillong, Nailar 12 : Ka MLA skhim kam dei ka kam ban ïalehkai politik shisien san snem hynrei ïa kane ka skhim yn sam man la u snem sha ki paidbah ka constituency pynpaw u MLA jongka Mawkynrew Constituency uba long ruh u myntri jong ka tnad Sport and Youth Affairs, Agriculture bad Sericulture u bah Banteidor Lyngdoh haba ai jingkren sha ki paidbah ha ka jingïalang mynta ka sngi ban pyllait ïa ka skhim Special Rural Work Programme (SRWP) 2018-19 lyngba ka Mawryngkneng Block ha Warmatlah.
Ha kane ka sngi ki paidbah na ki 10 tylli ki shnong kiba hap hapoh ka Mawryngkneng C &RD Block jongka Mawkynrew Constituency ki la ïapoi ban pdiang ïa kitei ki song jingïarap na utei u MLA jongki ha ka jingïatrei lang bad ka Mawkynrew Constituency Progressive & Implementation Committee (MCPIC).
Kane ka jingnoh synniang u MLA ka la long da ki tin sop ïing (CGI Sheet) sha 200 tylli ki longïing mar lai ban kaba kot sha ka 30 lak tyngka, ka song jingïarap pisa sha ki 310 ngut ki longïing nongrep mar 5000 tyngka ba kot sha ka 15 lak 50 hajar tyngka bad kumjuh ki Work Order ban pyntrei ïa ki jingtrei ba donkam ki paidbah nongshong shnong ha kine ki 10 tylli ki shnong ba la kot sha ka 20 lak tyngka.
Haba kheiñ kyllum u MLA tang ha kine ki shiphew shnong u la pyn-tyllun haduh 65 lak 50 hajar tyngka na kane ka skhim. Kine ki shnong ki kynthup ïa ka shnong Madanlangning, Mawpyrshong , Warmatlah, Mawber ,Umsawlum, Thadan, Maw U Sam, Mawkathein, Laitkseh bad Umtngew.
Ha kane ka jingïalang sam skhim la ïa donlang ki nongkitkam shnong jong kine ki shnong, ki nongkitkam na ka MCPIC, kiba wan mih khmat na ka Mawryngkneng C&RD Block, ki nongïoh jingmyntoi na ki skhim na kine ki shnong, ki riew rangbah bad nongïalam ka seng saiñ-pyrthei Peoples’ Democratic Front ( PDF) Zonal Committee Mawkynrew Constituency, I kong Amanda Pakyntein, kurim u bah Banteidor Lyngdoh lem bad kiwei kiwei.
U bah Banteidor haba kren ha ka jingïalang sam skhim u la ong, “Kumba nga la kren bad kular ha ka por ïalap ilekshon ba nga la ong ba ngan trei hok bad ba ngan sam hok ïa ki skhim kiba dei hok jong ki paidbah bad kata ka dei ka kular bad mynta nga wanrah ïa ka skhim ha phi ryngkat ka jingkheiñ kaba biang thik.
Kane ka dei ka sngi ka ban sah kynmaw ha ka jingim jong nga bad nga thrang bad angnud ban sam ïa ki skhim haba shai haba shit. Nga kwah ban ong ba kiba donkam hok ki dei ban ïoh ïa ka jingïarap”. Da kaba kdew ba hooid ym lah ban pynbiang lut, hynrei ki bym pat ïoh kin ïai shah bad ïai ap la ka pali bad kane ka skhim ka dei jong u 2018-19 bad kan sa wan sa ka skhim jong u 2019-20.
U la ong “Ngam kwah ban sam skhim shisien san snem namar nga kwah ban ïohi ba kane ka constituency kan kiew nadong hadong bad ngan long kum u nongïalam bad ym dei ban ïalehkai politik shisien san snem”. Halor ka jingïarap pisa ïa ki longïing nongrep u la pynshai ba kane ka dei ka skhim ban ïarap ïa ki ban kyntiew ha ka kam rep kam riang ym pat ba mar syn ïoh ïa ka pisa kin leit pynlut ha ka riam ka beit ne kiwei kiwei pat.
“Nga wanrah ia ka skhim haba shit ba shai bad kiwei kiba kwah hadien habud ban wad RTI halor ka skhim MLA ruh ki lah ban ban wad lada nga pyndonkam bakla ïa ka skhim. Teng teng na ka tulop lajong ruh hap sei khamtam ha ka iap ka im bad nga dei u shakri paidbah bad ngan nym khuslai ban biang ki paidbah ka constituency” ong u bah Banteidor.
Da kaba ong ba u buh ha khmat ïa ka pule puthi, ka koit ka khiah bad ka surok, u la pynpaw ba ka sorkar MDA ka la mynjur ban pyllait pisa na ka bynta ban siang surok rong na Thangsning shaduh Thynroit. “Nga ïoh sngew ba kiwei ki ong ba u bah Paidang u long kumjuh kum kiwei pat hynrei ngam tuklar ïa kita ïa kiba la dep hynrei nga la leh shitom ban wanrah mang tyngka na ka bynta ki surok bapher bapher ha ka constituency”, u la ong.
Napdeng kiba la ai jingkren, u bah Kroi Sohtun, President ka School Managing Committee (SMC) Warmatlah SSA UP School, ba la 95 snem ka rta, ula pynpaw ba ha ka jingïaid lynti jong u hi um pat ju ïohi ka roi ka par kaba wan ha constituency kum kaba long mynta.
“Ha ki por mynshwa ki don ki nongmihkhmat kiba shu wan ai jingkular shwa ka ilekshon hynrei da ki la jop pat ym don kano ka jing-pynurlong ïa kine ki jingkular ha kaba dei bad ka lynti syngkien, ka surok bad kiwei kiwei ki kam pynroi ha ka constituency”, la ong u bah Kroi.
“Kane ka dei ka sien ba nyngkong ban ïohi ba u MLA ba na ka constituency ban sam ïa ki skhim katba kiba bun te tang ki jingkular…naduh ba wan u bah Banteidor kum u MLA, ka MLA skhim la ïohi haba shit haba shai bad ngi ïoh man u snem ym kum mynshwa ba ïoh beit tang shwa ka ilekshon”, la ong une riew tymmen.