Press "Enter" to skip to content

Ïoh tam ki Pulit ar tylli ki bomb Mortar na East Khasi Hills

Shillong, Nailar 12: Ki Pulit ka East Khasi Hills District ha u bnai bala lah, kila ïoh ban tam ïa artylli ki bomb Mortar napoh ka District bad hadien la pynbthei noh ïa ki da ki Pulit Bomb Squad ka Jylla.
I Superintendent of Police ka East Khasi Hills, kong Claudia A Lyngwa haba ïakren bad ki nongthoh khubor i ong ba ïa kine ki bomb mortar shell la ïoh ban tam uwei na Nongmensong bad uwei na shnong Sohryngkham, kaba jngai kumba 20 Km na Shillong.
Kine ki bomb mortar ba dang treikam, la lap nyngkong da ki paidbah ha Nongmensong, kiba la pyntip mar mar sha ki Pulit katba ïa uwei pat ha Sohryngkham la aiti da uwei u briew hadien ka jinglap ïa une u bomb ha ka jingpuh kper.
Haba kylli, i Kong Claudia i ong, la antad ba kine ki bomb mortar ki dei jong ka thma bah ba-ar bad bynrap ba ïa kine ki bomb ba dang treikam, la pynbthei noh da ki Pulit Bomb Squad ha Mawlai Mawiong hadien ka jingïoh jingbit na ka Ïingkashari.
I kong Claudia i ong ba ka jingbthei ka long kaba la jam bha haduh ba kala pynkhynñiuh ïa ka MLP Battalion baroh kawei. “Nga ainguh ïa u Blei ba kine ki briew kim shym la ialehkai bad kine ki bomb lane die ïa ki kum ki marjot”.