Press "Enter" to skip to content

Ka por kaba eh ïa ka Seng UDP

Ka Seng UDP kaba long ka Seng Riewlum kaba khlaiñ tam ha ka jylla, ka ïaid ha ka lynti kaba eh bha mynta bad kane ka la wan tang mar ïakhlad noh u Dr. Donkupar Roy, uba la ïalam ïa ka Seng kum u President la bun bun snem. Ka jingeh ka long ba da kane ka jingkhlad noh u Dr. Donkupar ka UDP ka hap ban pyndep ïa kiba bun ki kam. Kawei ka long ban hap jied President da uwei, kawei pat hap jied Speaker da uwei bad lada ki kynhun hapoh ka Meghalaya Democratic Alliance (MDA) ki ïa mynjur ba ka shuki Speaker kan leit biang sha ka UDP, ka mut ba ka Seng kan hap sei sa ïa u MLA ban long kum u Speaker. Lada jia ba une u kyrtong Speaker udei uwei napdeng kiba long Minister ha ka sorkar, ka Seng kan hap jied pat sa uwei u MLA ban kiew shuki kum u Minister.
Kine kidei ki por kiba eh shisha na ka bynta kane ka Seng bad kumba la pynpaw da ki nongïalam ka Party ha ka por ba khlad noh u Dr. Donkupar ba ki la shah iehnoh khunswet, imat ka long shisha kumta, khamtam ha kine ki por kiba ka Seng ka donkam ban shim ïa ki rai kiba eh bad kiba donkam bha. Ym pat ju kynmaw ba ka UDP kan mad ïa kine ki jingeh kiba katne, naduh ba la seng ïa ka. Kane kadei ka sien kaba nyngkong eh ba kan jia kumne, ha kaba kan hap ban shim ar ne lai tylli ki rai ha kajuh ka por. Nangta nalor kine kiba kan hap ban pynbeit noh ha kine ki sngi ban wan, kan bud pat sa ka elekshon shiteng samoi ha Shella ban jied bujli ïa u MLA ha jaka u Dr. Don. Kumba ka paw hi imat ka mon jong ka UDP baroh kawei ka long ba un mih ban ïakhun u khun jong u Dr. Don, u Balajiedkupar Synrem. Hynrei kane ruh kan long kumba pynshlur ïa ka saiñpyrthei hiar pateng ne ka dynastic politics, kaba ki dak ki shin ki paw ba la jur bha katba nang mih ki sngi ha kane ka jylla. Ka ri India ka thnem bha ka jingïatai halor kane ka saiñpyrthei hiar ne ïoh pateng, kaba baroh shi katta kaba shah kdew kti eh kadei ka Seng Congress, namar ba ka jingïashim nongïalam ha ka Seng ka dei beit na ka ïing ka sem ki Gandhi.
Haba phai sha ka jinglong President ka UDP, kan nym dei kaba suk ban ïoh da u briew ba ka Party ka ïamon lang. Namar ha ka snem 2004 hadien ba u (L) Bah EK Mawlong, u la rem noh ha ka elekshon na Umroi Constituency, ka UDP kam shym la jied shuh ïa u kum u President, hynrei ka la jied noh ïa u Dr. Donkupar Roy, namar ba udei u MLA ne uba don ha ka shuki. Mynta napdeng ki saw ngut kiba paw kyrteng bha ban long kum u President ka UDP, tang uwei uba long MLA bad uba don ha ka shuki, kiwei pat ki lai ngut kim don satia ha ka shuki. Ym tip kaei ka mon jong uba bun uba lang hapdeng ki dkhot bad ki nongkyrshan jong ka UDP. Hato kan aiti ha ka sien kaba nyngkong eh ïa ka kam President sha ki briew ki bym don ha ka shuki MLA ne kin leh da kumwei pat. Kan shong ha ka jingstad ka Nomination Committee kaba dei ka bor ban jied ïa ki nongkitkam ha shuwa ban mynjur ka General Council.
Kaba eh tam mynta ïa ka UDP kadei ka kam Speaker, ïa kaba ka Seng ka ladep pynpaw shai ha ka Central Executive Committee (CEC) ba kane ka shuki kadei ban leit biang sha ka UDP, kumba la ïoh bat da u Dr. Donkupar ha shuwa ba un khlad. Napdeng ki 6 ngut ki MLA ka Seng bad 2 ngut ki Associate Member, lai ngut kidei kiba don ha ka kynhun Myntri bad san ngut ki don shabar ka kynhun Myntri. Lada shim na ka experience ha ka kam nongmihkhmat kiba la lah ban bat ïa ka shuki Speaker, don tang arngut napdeng ki lai ngut ki Minister. Napdeng ki san ngut kiba don shabar ka kynhun Myntri, don tang uwei uba la jop arsien. Kiwei kiwei ki dang jop mar shisien, kata tang mynta ka kynti. Ban bat kat ïa ka shuki Speaker kam dei kaba suk, donkam ki briew kiba la tip bha ïa ka rukom pynïaid ïa ka ïingdorbar. Ym lah ban shu ai ruma ha ki nongmihkhmat kiba thymmai, wat lada ki stad makna katno katno ruh. Kane kan dei kaba eh bha ïa ka UDP.
Nangta lada jia ba uwei napdeng ki experience member uba dei u Minister, ka mut ka UDP kan hap jied uwei napdeng ki san ngut ki MLA ban kiew ha ka kyrdan Minister. La ïohi ba ka la don lypa ka jingïaknieh na ka bynta ka shuki Minister, ha kaba ka UDP na Mawthadraishan ba la mihkhmat da u Bah HB Nongsiej, ka la byrngem lypa ba lada jia ba u Bah Nongsiej um ïoh shuki Minister, kan pynjah rngai ïa ka UDP na Mawthadraishan ha u 2023.
Hapdeng kine ki por kiba eh bad kiba ka Seng ka donkam ban shim ïa ki rai kiba eh bha, ka UDP ka donkam ïa ka jingïarai bad ka jingïabeit lang hapdeng ki nongïalam jong ka. Lym kumta kane ka khep ka lah ban dei ka turning point naka bynta ka Seng, kaba lah ban long kaei kaei kaba pynduh mynsiem ïa kiba bun, khamtam ïa ki nongkyrshan jong ka.