Press "Enter" to skip to content

Kem ka ANTF sa kawei ka Kynthei na Manipur, kurup drok ba 5 klur

Maham ka SP ba ap jingma lada ym lah tehlakam
Shillong, Nailar 12: Ka kynhun ki Pulit ka Anti Narcotixs Task Force (ANTF) kila ïoh ban kem biang sa ïa kawei ka Nongshalan droks na Jylla Manipur lem bad uwei u Khynnah ha ka jingkhynra droks hynnin ka sngi U Blei bad na kane ka briew la ïoh ban kurup ïa u droks ba shongdor kumba T. 5 klur duna.
Ka kynhunANTF jong ka East Khasi Hills bala ïalam da u SDPO (Dardar) Jaspal Singh, kala ïohkem ïa kine ki arngut na kawei ka bos ba wan na Jylla Manipur sha Shillong. La ïoh ban kem ïa ki ha ka surok bah jong ka thaiñ Mawryngkneng, haka jingpyn ap shrip kat kum ka jingtip ba ka kynhun kala ïoh ban lum.
Ha ka jingtalasi, ka kynhun ANTF kala ïoh kurup haduh 80 tylli ki synduk sabon ba thep ïa u droks heroin na ka pla jong kane ka nong Manipur kaba la tip kyrteng ka Veineithem Haokip ba 25 snem ka rta, kaba dei na ka shnong Teigang, Manipur. Kane ka briew kala wan lang bad uwei u Khynnah (bala buhrieh kyrteng).
Ka Superintendent of Police ka East Khasi Hills Kong Claudia A Lyngwa, ïa ka Veineithem la pynngat mynta ha ka kyndon 21 (C0/29 jong ka Nacotics Drugs and Psychitropic Substance (NDPS) Act bad ïa une u Khynnah (Ïa kaba ym pat lah pynthikna ïa ka jingdonkti jong u ha ki kam khaii droks) la phah sha Children Home.
Haba pyntip ba kane ka jingkurup droks ka dei kaba heh duh jong ka Tnad Pulit ha ka histori jong ka Nongbah Shillong bad ka Jylla, u Jaspal Singh ula ong “Ka jingkhia jong une u droks ka la kot sha ka 930 gram (duna khyndiat ïa ka 1 kg) bad ka dor jong u ha ki iew surok ka kot sha ka T. 4.5 klur”.
Une u SDPO u pyntip ruh ba ïa kane ka bos kit briew ba don u nombor MN04-P-1451 la kurup ruh da ki Pulit ha kane ka jing khynra droks.
Haba shem ba ka don ka jingïapher ha ki synduk leit jingleit (luggage) kam iahap satia bad ka jingai jingtip bala kdew ha ki kot ki sla jong ka bos, u Jaspal u ong ba u Nongniah bad u Conductor jong ka Bos ha ka jingtohkit, kila phla ïa ka jingdon ki lai tylli ki jaka kyndong ban buhrieh tiar ha ka bos bad na kine ki jaka, la ïoh ruh ban kurup ïa u sikret nongwei ban shalan tuh.
Haba pynpaw ba ki Pulit kila shem ba ki don ki kynja kynhun ba shalan ïa shibun ki tiar khaii tuh sha Nongbah Shillong kynthup u droks, i kong Claudia ula ong ba lada phi don ïa ka bos kamai bala shna wat ïa ki jaka kyndong ban buhrieh tiar, kane hi ka mut ba ka kam khaii be-aiñ kala ïaid la slem bha. “Na kane, ngi sngewthuh ba ka don ka jingkhaii be-aiñ kaba jur bha na ki katto katne ki Jylla ka thaiñ Shatei Lam Mihngi kiba wan sha Jylla Meghalaya” ïa ong.
Haba kylli la ka Tnad Pulit ka Jylla kan pan ne em ïa ka jingiatreilang bad kiwei pat ki Jylla ban tehkam ïa ka kam khaii be-aiñ, i kong Claudia ila ong “Ngi kwah ruh ban don ka jingïaphylliew jingmut bad kiwei ki Jylla ban iawad ïa ki lad ki lynti kumno ban tehlakam ïa kane ka kam”.
Nalor kane, i kong Claudia ula pyntip ba ha ka jingshisha wat u Director General of Police ula dep kren ïa ka jingjur ka jingshalan ïa u droks na Manipur sha Meghalaya ha ka jingïalang Coordination Conference jong ki DGP ba long dang shen ha Imphal. “….Nga don ka jingngeit ba kan sa don biang kum kane ka jingïalang ha Shillong bad ngi la dep ïaphylliew jingmut ba ka jingshalan droks kan dei ka mat ba kongsan bha ban sa ïakrenha kane ka jingïalang nalor ki kam tuh kali naba naduh ba nga wan ban shimti, ngi la ïoh ban kurup biang haduh 5-6 tylli ki kali ba shah tuh na Manipur”.
Haba kylli, i Kong Claudia i ong ba haduh mynta, ki Pulit kila ïoh ban kurup haduh 2300 gram u heroin ba shongdor kumba T. 10 klur na ki 21-21 tylli ki jingïohkem naduh ba i shimti kum ka khliehduh jong ka District ha kine ki khyndiat bnai bala leit noh. Ila shem ruh ba bun na kiba shah kem ki dei ki Kynthei.
Halor ka jingkynnoh ba ki Pulit ki lah ban iadonkti lang bad ki nongshalan droks, kane ka Heh Pulit kala kyntait bad ong “Ban shu kynnoh hi ka long kaba suk bad mano mano ruh ki lah ban ong ïa shibun kiei kiei hynrei ka eh pat ba ym don ki sakhi. Ym pat shym la don kawei ruh ka case ba ha ka jingtohkit lane ha ka jingkurup droks ba ngi lah ba ki Pulit ruh ki iadonkti. Ha ngi hi, lada ki pulit ki donkti ngin hap ban kem beit bad ngim lah ban ailad ïa ki Pulit ba kin ïoh ïaid laitluid lane muja ha ka jingkhaii droks..Ha ngi hi unongdie droks u dei hi u nongdie droks”.
Haba kren halor ki kyndon ba pyrrkhing jong ka NDPS Act, i kong Claudia ila kyntu ïa ki Sengbhalang ba kin pyntip sha ki Pulit haba ki don jingtip ïa ki kam khaii droks ym ban pynlong hi dalade ïa ka jingkhynra. “Lada ki Sengbhalang ki kwah shisha, ki lah ban bat ïa uno uno u briew ba ki suba hynrei ym ban ktah kti ne talasi ïa ki khnang ba ka case kan nym tlot lane shah thlieh da ka sic” ong i kong Claudia.
Haba pynpaw ïa ka jingsngewkhia halor ka jingjyllei u droks, ine Heh Pulit ila ong, ba lada kat une u droks u wan poi hangne, shu pyrkhat ba haduh 1 kg u droks u leit sha katno hajar ngut shuh ki briew hangne ha Nongbah. Kane ka long kaba ima shisha.
“Nga kwah ban phah ïa ka khubor sha ki kmie ki kpa, ka imlang sahlang, ki shnong ki thaw ba balei ki khynnah ba hapdeng 10-12 snem ki kylla kyrni dih droks, hato ym don shuh ka jingsneng jingkraw na Ïing, hato ki kmie kpa kila bunkam palat hala ki jong ki kam. Ngi hap ban treilang kum ka imlang sahlang. Ka kamram jong ngi ka long ban kem, ban set ïa ki ha along bad ban pynthikna ba kinnym ïoh mih na along, hynrei mano ba khmih pat sha kiwei ki bynta jong kane, mano ba khmih ïa kine kiba la ngop, .haba kut hi, ki dei kiba kiba la ngop ki ban jynjar” ila ong.
I kong Claudia i ong “Ngi la don ka jingïakren bad ki doktor namar ngi kwah ban ngam jylliew ïa kane bad phi tip ïa kaei kaba ki ong, ki ong ba lada ka Shillong bad ki nongshongshnong ka Shillong kim shimkhia ïa ka jingjyllei u droks bad lada ka ïing lah sahlang bad ki Balang kim mih shakhmat ban iatreilang halor kane, tang hapoh kine ki arsnem lai snem, ngi lah ban duh noh haduh 50-60 % na ki samla bad ki samla jong ngi ki lah ban kylla long kiba kyrni dih droks”.
I kong Claudia i ong ba lada ïa kane ka jingeh ym lah ban tehlakam ha kine ki khyndiat snem ban wan, ngin sa ïoh ïa ka imlang sahlang jong ki Zombie hangne ha Nongbah Shillong, ha kaba ki briew kin jam ïa u pud ban tuh bad pynïap briew haba sot ïa katto katne ki jingjia.