Press "Enter" to skip to content

Kwah ki nongtrei Rural Bank ban thung kam ïa ki trai jylla

Shillong, Nailar 12 : Ka kynhun ki nongtrei jong ka Rural Bank hapoh ka lama jong ka All India Regional Rural Bank Employees Assocïation (AIRRBEA) ki la dawa ba donkam ban thungkam beit da ki trai jylla ha man ki Regional Rural Bank.
“Dei ban ailad ïa ki trai jylla bad wat kito kiban wan trei ruh ki dei ban sngewthuh ïa ka ktien ka thylliej bad ïa ka kolshor jong ka jylla,” ong u SV Reddy, Secretary General ka synjuk haba kren bad ki lad pathai khubor.
Nalorkata, u ong ruh ba donkam ban ailad shwa ïa ki trai jylla ha ka ïohkam ïohjam khamtam eh ha kito ki kam Clerk.
Na ka liang u Reddy u la ong ruh ba ka AIRRBEA ka pyrshah jur ïa ka jingthmu
ban don bynta lang haduh 49 persen da ki kynhun shimet ha ki Rural Bank.
“Ngi pyrshah jur namar ka jingdon bynta lang ki kynhun shimet ban pynïaid ïa ki Rural Bank kan pynïap noh ïa ka jingthmu jong ka, kaba don ïa ka thong ban pynpoi ïa ka jingshakri ha ki kyndon kynshrot jong ka jylla,”bynrap biang u secretary general.
Na ka liang u Tom Chhetri, General Secretary ka Meghalaya Rural Bank Officer’s Assocïation u la ong ba ka CD Ration ha ka Meghalaya Rural Bank ka long 39 haduh 40 persen.
La ïathuh ruh ba ki don haduh 94 tylli ki shnat treikam jong ka Meghalaya Rural Bank ha ka jylla baroh kawei.