Press "Enter" to skip to content

Pynliem ka MLP ïa ka Imson ha ka First Div, ka Riatsamthiah ïa ka Wahingdoh ha Second Div

Shillong, Nailar 12: Ka MLP kala lah ban pynliem noh ïa ka Imson SC ha ka lympung ïalehkai First Division Footbal ka Shillong Sports Association da 4-1 kol ha ka jingïalehkai kaba la long ha JN Stadium, Polo.
Ha ka jingïalehkai ka MLP kala ïoh ïa ka kabu ban pynkhih nyngkong ïa ka jar lyngba u B. Kharumnuid ha ka minit kaba 27 bad ka Imson kala ïoh ban pynphai kylla lyngba u W.Kharlukhi ha ka minit kaba 36, hashuwa ban kut ka jingïalehkai jong ka kylla step u Everywell Khongjee jong ka MLP ula ïoh ban pynkhih ïa ka jar ha ka minit kaba 42 bad ka jingïalehkai jong ka kylla step ka MLP kala tam da 2-1 kol.
Haba la wan ban bteng biang ïa ka kylla miet ka MLP kala nang kyntiew bha ïa ka rukom ïalehkai bad ïoh biang sa kawei ka kabu kaba biang ban thep ïa ka kol kaba lai kaba la wan lyngba u N.O.Gapthoh ha ka minit kaba 67 bad u Everywell Khongjoh ula ïoh biang ban pynkhih ïa ka jar ha ka minit kaba 81.
Watla ki rangïalehkai ka Imson SC kila pyrshang ban ïakhuh tyngeh ban ïoh pynphai kylla ïa kitei ki kol hynrei kane kam shym la seisoh namar ka jingkhlaiñ jong ki rangïalehkai shadien ka MLP bad haduh kaba kut ka Imson kala mad noh ïa katei ka jingshah rem da 4-1 kol.
Ka jingïalehkai mynta ka sngi ka Lawsohtun SC kan ïakhun pyrshah ïa ka Nongkrem SC ha ka por 3:15 baje janmiet ha JN Stadium, Polo.
Second Division : Ha ka lympung jong ka Second Division ka Riatsamthiah SC kala pynliem noh ïa ka Wahingdoh SC da 3-1 kol ha ka jingïalehkai kaba la long ha Third Ground, Polo bad ha kane ka jingïalehkai ka Riatsamthiah kala ïoh ban pynkhih jar nyngkong lyngba u B. Lyngdoh tang mar syn sdang ka jingïalehkai kata ha ka minit kaba 2 u CL Marshillong u la ïoh ban thep ha ka minit kaba 52 katba u B. Marshaing ha ka minit kaba 77.
Katba ïa ka shi kol na ka bynta ka Wahingdoh la ïoh ban thep da u Michael Kshir ha ka minit kaba 21.