Press "Enter" to skip to content

U Ma Lahkmen kum u Lamphang, Bah Brol kum u Myntri ha ka sorkar MDA

Shen yn shong ki MLA UDP ban shim ïa ka rai khatduh
Shillong, Nailar 12 : Ïa ka shuki Lamphang jong ka Iing Dorbar Thawaiñ ka Jylla, kaba bat da u President jong ka UDP, Dr. Donkupar Roy shwa ba un khlad noh, lah ban shimti noh da u MLA ka War Jaiñtia, Ma Lahkmen Rymbui uba bat ruh mynta kum u Myntri ka tnad Pule Puthi ka Jylla.
Ki tyllong khubor ba la ïoh lum, ki ïathuh ruh ba ïa ka shuki kaba bat baroh shi katta da u Ma Lahkmen yn shimti noh pat da u Bah HB Nongsiej (Bah Brol), MLA ka Mawthadraishan.
La ïoh jingtip ruh ba shen ki MLA jong ka UDP kin sa kynduh biang ban shim ïa ka rai kaba khatduh halor katei ka bynta.
Kumba long mynta, ka UDP da ka jingkhlad noh u Dr. Donkupar Roy, ba dei ruh u MLA ka Shella, ki don sa tang 8 ngut, kata 6 ngut ki MLA ba jop na ka party bad arngut kiwei pat kum ki Associate Member ka party ba kynthup ïa u Bah SK Sunn bad u Samuel A Sangma.
La ïathuh ruh ba ka rai ban jied ïa u Lamphang hi ka shong ha ki MLA bad kumba long haduh mynta hi napdeng ki MLA dei tang u Bah Metbah ba dei ruh u Myntri ka tnad Water Resources bad u Ma Lahkmen kiba kham biang ban shimti.
Hynrei ban shimti pat ïa ka shuki Myntri, ka la mih ka jingpynsngew ba na ki lai ngut ki MLA (ba jop na ka party) ki bym pat bat shuki Myntri dei tang u Bah Brol uba kham rim namar u la jop arsien katba kiwei pat ki dei kiba dang jop thymmai.
La ïoh jingtip ruh ba tad haduh mynta hi, katei ka dang dei tang ka jingïakren hapdeng ki MLA hynrei ïa ka rai kaba khatduh kin sa shim ha ka por kaba biang.