Press "Enter" to skip to content

Jurip ki Scientist bad ophisar ba pynjulor ki khñiang ïa ki Sla Ryndia ha Warmawsaw

Nongpoh, Nailar, 14:Ka jinglynniar ki Nongrep hadien ka jingwan pynjot ki kynja Khniang ïa ki Sla Ryndia ha ki Shnong ba hap ha ka thaiñ Warmawsaw ha Ri Bhoi District ka la long shisha ka jingeh kaba khraw ïa ki Nongrep, namar kum ki nongrep ki la shem jingeh shisha halor ka kam ri Khniang Ryndia namar ki sla ryndia ba ki ai bam ïa ki khniang Ryndia ba ki ri la wan ban pynjot naphang da ki kynja khniang ha ki jaka rep ba ki thung ïa ki sla Ryndia.
Halor kane ka jingkynduh mawsiang bad ka jingeh ki nongrep na ka jingwan pynjot kitei ki khniang ïa kitei ki mar rep ban bsa bam ïa ki Niangryndia, na ka liang ka District Sericulture Officer ka Ri Bhoi, ka Kong R.B Lyngwa bad la synran lang ruh ki Scientist na ka Central Silk Board jong ka sorkar kmie hynnin ka sngi Baar ka taiew ki la leit syndon ban hiar jurip na ka bynta ban bishar bniah halor ka jingwan pynjot kitei ki khniang ïa kitei ki sla Ryndia.
Ki Scientist na ka Central Silk Board kiba la don lang ha kane ka jingleit jurip ki kynthup ïa u Dr. Dr. B.N Sarkar, Dr. Abishek Chauhan bad kumjuh ruh ki ophisar sorkar na ka Zonal Office Shillong, ba la wan mihkhmat da I B. Nongrum bad kiwei kiwei ki ophisar ryngkat ka jingïadon lang u Rangbah Shnong, u Bah S. Wahlang bad ruh ki nongrep kiba la shah ktah ha kaei ka nemsniew ba wan hiar thma ki khniang ïa ki mar rep.
Katkum ka jinghiar jurip kine ki ophisar bad ki Scientist la lap ba kitei ki khniang kiba wan pynjot ïa ki Sla Ryndia ki dei ki khniang ba la tip kum ki Niangtda lane Khniang Saidsaidho ha ka ktien Shnong bad ha ka ktien phareng la tip kum kita ki Semilooper.
Haba ïa kren bad u Nongthoh Khubor u Mawphor, ka Kong R.B Lyngwa, District Sericulture Officer ka Ri Bhoi, ka la ong ba katkum ka jingwad bniah ha kane ka jingjurip ryngkat ka jingdon lang ki scientist la shem ba ka jingshah pynjot ka la ktah shaduh ka 90% bad ka la dei sha kata ka jingshah ktah kaba la kot sha ka Pupal stage ha ka ktien nongwei kaba mut ba kitei ki khniang ki la jan kylla Nianglong bad lada ym lah ban ïada ka jingshah ktah ka dang jur ba kitei ki kynja khniang ki dangroi na ka por sha ka por.
Ka la ong ruh la donkam kyrkieh ban shim ki lad jingiada ban pynduhjaid kum kine ki jaid khniang kiba wan ban pynjot ïa kitei ki Sla Ryndia, namar lada ym lah ban tehlakam ha u snem ban wan ruh kajuh ka jingeh ki Nongri Khniang kin kynduh jingeh ba kin kyrduh ïa ka Sla Niangryndia ha kaba bsa bam ïa ki Niangryndia ba ki ri.
“Ka kam ri Khniang Ryndia ka dei kawei na ka kam ba kiba bun ki nongrep ki im jakpoh namar ïa u Khniang ki dei na ka bynta ban bam doh bad ka sop jong u khniang pat ki die ha ka dor kaba rem na ka bynta ban pynmih ki jaiñ ba rem dor khamtam ka Ri Bhoi ka dei kaba bna nam ha kaba pynmih ïa ka jaiñ Ryndia ba iaid iew ha kylleng ka ri.
“Katkum ka jingwad bniah ki Scientist ha kane ka jingleit jurip la shem a ka long kaba eh ban pynduhjaid ïa kitei ki kynja khniang, namar la lap ba ki roi sha ba palat haduh ba ki la lah ban pynjot lut ïa ki sla bad wat ïa ki tnad sla Ryndia bad kitei ki khniang ki la pynjot ruh wat sha ki sla phandieng” ong ka Kong Lyngwa.
Ka la iathuh ruh katkum ka jingpynpaw ki Scientist ki don ha ki lai bynta ban pynduhjaid ïa kitei ki Khniang ha kaba ha ka ktien nongwei la tip kum kata ka Mechanical Control, Biological Control bad ka Chemical Control, bad ha kane ka jingshah ktah la hap ban leh noh da ka Chemical Control kata ka mut ban shu pyniap noh ïa kitei ki khniang da ki kynja dawai ban pynduhjaid ïa ki.
Namarkata, ka la ong ruh halor kane ka jingshah pynjot kitei ki kynja jingthung ki nongrep kan sa phah ïa ka kaiphod sha ka sorkar na ka bynta ban thaw noh mardor ïa ki lad ki lynti kumno ban pynduhjaid ïa kitei ki Khniang, namar lada ym lah ban pynduhjaid ka jingeh ka long ba kitei ki khniang kin nangroi ba kaba jingeh kan dang bteng ruh wat ha ki snem ban sa wan, ka la bynrap.
Shuh shuh, kum ka District Sericulture Officer ka la kyrpad ruh ïa ki nongrep ba lada ki lap ha ka por ba biang kum kane ka jingpynjot ki khniang ki dei ban pyntip noh mardor sha ka ophis treikam jongka, khnang ba kum ka tnad sorkar kan lah ban thaw ki lad ki lynti ha ka por kaba biang ban iada na ka jingwan hiar thma kitei ki kynja khniang ba ki nongrep ki kynduh mawsiang halor ka kam ri Khniang Ryndia kaba kim lah shuh ban bsa bam ïa ki Niangryndia na ka jingwan pynjot kitei ki khniang ïa ka sla Ryndia, la bynrap shuh shuh ka Kong Lyngwa kum ka District Sericulture Officer ka Ri Bhoi District.