Press "Enter" to skip to content

Kaweh ki lama Ri India ha Shillong

Shillong, Nailar 14: Katba ka Ri India ka dang ap ïa ka 15 tarik Nailar ban rakhe ïa ka ‘Sngi Laitluid’ ba 73, shisngi ïa kane, ka Nongbah Shillong kala phuh da ki lama lai rong ka Ri India, kiba la kaweh ha kylleng ki jaka kum ka jing pyn khreh ïa ka jing wan jong kane ka sngi bakhraw ka Ri.
Ka Jylla Meghalaya kumba long kiwei ki Jylla ka thaiñ Shatei Lam Mihngi ka Ri, ka dei kaba ju ïohi ïa ka jingkynjah slam slam ka jingrakhe ïa ki sngi bakhraw ka Ri la ka dei ka ‘Sngi Laitluid’ ne ka ‘Republic Day’ ha ki snem bala leit noh. Ka jingkynjah baroh ka dei tang na ka daw ki kam jong ki Kynhun kaikhlaw.
Ka Jylla bad ka Nongbah Shillong, hynne ka sngi balang kala phuh bha da ka jingkaweh jong ki lama lai rong ka Ri India kat shaba phai ki khmat. Ki surok kila dap da ki lama lai rong bala pyndait ha ki kali-kiba ïaid kylleng ki jaka, naduh ki kali jong ki riew shimet, ki kali arshaka, ki kali kamai bad ter ter.
Ka jingkylla ha Jylla Meghalaya khamtam ha Nongbah Shillong kala sdang ban paw ha ki khyndiat snem bala leit noh ha kaba la ïohi ba ka jingrakhe ïa ki sngi khraw ka Ri kila sdang ban shongshit bad iphuh iphieng bha. Kane baroh ka dei na ka jingwan phai biang ka jing shongshngaiñ bad ka jingshongsuk hapoh ka Jylla. “Khublei ïa ki Pulit bad ki bor ka Aiñ kiba lah ban tehlakam ïa kane”.
Mynta bala jai jai ka mariang, ka jingrakhe ïa ka ‘Sngi Laitluid’ mynta ka kynti kumba ka paw hynne ka sngi balang, kan long ka jingrakhe kaba shongkun bha ha Jylla khamtam ha Nongbah Shillong bad na ki dak ki shin, la ïohi ba ki paidbah kim shlan shuh ban iamih nala ïing ban ïashimbynta ha ki jingrakhe bala pynlong ha kylleng ki jaka.
Wat ki skul bad jaka pule ruh kumjuh, kiba bun kila pynkhreh ïa ka jingrakhe ba kyrpang hala ki jong ki jaka pule bad kila bthah ruh ïa la ki jong ki Khynnah ba kin wanrah ïala ki jong ki lama lai rong ban pyndon burom ïa kane ka sngi.
Na ka liang jong ka Tnad Pulit kala pynkhlaiñ bha ïa ka jingpahara ha kylleng ki jaka jong ka Jylla naduh ki jaka khappud haduh ki jaka sor ban pynthikna ba ka jingrakhe kan long kaba ïaid beit ïaid ryntih bad kaba shongkun ha baroh ki liang.