Press "Enter" to skip to content

Ong sa u CM: Yn rai ka MDA ia ka shuki Speaker

Shillong, Nailar 14: U Myntri Rangbah ka Jylla Conrad Kongkal Sangma ula kyntait ba ka don ka jingiapher jingmut hapoh ka kynhun synrop Meghalaya Democratic Alliance (MDA) halor ka shuki Lamphang ka Iingdorbar Thaw Aiñ.
“Ym don satia kata jingshong synjor jong ka kynhun synrop bad kata ka jingiapher jingmut” ong u Conrad haba iakren bad ki lad pathai khubor hynne ka sngi balang.
Ka United Democratic Party (UDP), kaba dei ka kynhun ba wan ba-ar ha ka jingbun paid hapoh ka MDA ba lamkhmat da ka NPP, kala kam ba ka shuki Lamphang ka dei ban leit sha ka Party naba ia kane ka shuki la bat da u President Dr Donkupar Roy, uba la khlad noh ha u bnai bala lah.
Hynrei u Symbud Myn-tri Rangbah ka Jylla Bah Prestone Tynsong hynnin ka sngi, ula ong ba ka shuki Speaker kam dei satia jong ka UDP marwei bad ka UDP kam lah ban kam trai. U ong ba ka kynhun MDA kan sa shim rai lang halor ka jingjied ia u Lamphang ba thymmai.
Haba kylli, u Conrad ula ong “Ki seng saiñ pyrthei ki don ia ka jinglaitluid hala ka jong bad don ruh ia ka hok ban pynpaw ia ki jingsngew jong ngi bad nga tharai ka UDP bad u DyCM kila pynpaw iala ka jong ka jingsngew hynrei kumba nga ong, dei ka MDA ka ban sa shim lang ia ka rai.
“….Nga la kren shai naduh ka sngi ba nyngkong ba ka shuki Lamphang ka dei ka shuki ka ba hap ban iashim rai lang da ki paralok ha ka MDA. Nga tharai kam iahap ia nga watla nga long kum u Chairman ka MDA bad Myntri Rangbah ban ong eiei ia mynta namar kumba nga ong , ki don haduh 6 tylli ki party ha ka MDA” ula ong.
Haba pyntip ba ka jingiasyllok ia kane ka kam kala sdang iaid mynta, u Conrad u ong ba ka sngi ban pynlong ia ka jingialang jong ka MDA yn sa rah khatduh hadien ka 15 tarik u Nailar, ban iakren bad shim lang ia ka rai ia ka shuki Lamphang.
Ka UDP kala kyntu ruh ia baroh ki paralok ka MDA ba kin kyrshan ia ka Party ha ka elekshon MLA shiteng samoi ban long ha Shella Constituency.
Haba kylli ia kane, u Myntri Rangbah ka Jylla ula ong ba un nym lah satia ban kren ia kane na ka bynta ka NPP namar ka don ka State Unit ba hap khmih ia kane ka kam.
“Nga sngew ba ngam lah ban iaid lait ia ka State Unit. Ka State Unit ka lah ban iasyllok bad ka UDP bad hadien bad ka NPP” ula ong haba pyntip ba ki Nongialam ka UDP kila dep iakynduh ia u ban iakren ia kane ka kam.